Diyarname

Piştî îro bi fuzeyan êrîşê Hewlêrê kirin, Serokê Herêma Kurdistanê Nêçîrvan Barzanî daxuyaniyeke belav kir. Barzanî êrîş şermezar kir û got, “Armanckirina Hewlêrê bi vî awayî û dubarekirina wê, pêşhateke metirsîdar û binpêkirina eşkere ya ewlehî, aramî û serweriya Iraqê ye”

Serokê Herêma Kurdistanê Nêçîrvan Barzanî li ser êrîşa li hemberî Hewlêrê daxuyaniyeke nivîskî belav kir. Ew dibêje, “Xweşbextane di êrîşê de ti ziyanên canî çênebûn. Em hevsozên hevwelatiyên hêja yên Hewlêrê ne ku di bin nîgeranî û bendewariyê de demeke dijwar derbas kirin. Rûbirûbûna kêşe, gef û metirsiyan; pêkvejiyan, yekrêzî û bihevrekarkirina hemû alî û pêkhateyên Kurdistanê dixwaze.”

Barzanî teqez dike, “Armanckirina Hewlêrê bi vî awayî û dubarekirina wê, pêşhateke metirsîdar û binpêkirina eşkere ya ewlehî, aramî û serweriya Iraqê ye û ji bilî alozkirina rewşê û ziyangihandina bi niha û pêşeroja tevahiya Iraqê, ti encameke din nîn e.”

Serokê Herêma Kurdistanê Barzanî daxwaz ji hikumeta Iraqa federal û civaka navdewletî dike ku “bi awayekî cidî li ser van destdirêjiyan rawestin û hemû hewlên xwe bidin da ku zêdetir rê neyê dayîn bêrêzî bi serwerî û seqamgiriya welat û asayiş û aramiya hevwelatiyan bê kirin.”

SUPAYA PASDARAN GOT ME KIRIYE

Supaya Pasdaranbi daxuyaniyeke êrîşa li ser Hewlêrê girt ser xwe. Supaya Pasdaran wisa gotiye, “Navenda Plangerî û Xirabiyê ya Stratejîk a Siyonîstan bû armanca fuzeyên me yên bihêz.” Waliyhe Hewlêrê ragihandibû ku du bingeha Îsraîlê li Hewlêrê nîn e.

***

Nûçeya eleqedar:

- Bi fuzeyan êrîşê Hewlêrê kirin