Diyarname

Bi namey “Destpêk ra Heta Ewro Antolojîyê Şîîranê Zazakî” kitabêke veciya. Kitabo ke Harûn Bozkurtî kerdo hedre, Weşanxaneya Peywend ra veciya.

Xebatêke muhîm e resa verê wendoxanê kirmanckî (zazakî), Antolojîya Şîîranê Zazakî. Harun Bozkurtî serê şîîranê kirmanckî de lêkolîn kerdo û antolojîyeke muhîme serê şîîranê kirmanckî de kerda hedre. Bi ene antolojî wendoxî pê hesênê ke heta enka 205 niştoxan şîîrê kirmanckî nistê û ê heme kitab de ca girotê. Bi temamî 205 niştoxan re 308 şîîrê înan ene antolojî de hamey neşrkerdin. Miyanê kirmancan (zazayan) de di alfabey tewir tewirî yenê şixulnayişî. Herdekerdoxê anlotojî Bozkurtî şîîrê şaîran kovar, rojname, fanzîn û kitaban ra girotê la dest nêdaw miyanê înan, ê şîîrî çawey hamey nistişî bi eno awe antolojî de kerdê ca.

Doc. Dr. Îlyas Akman ke edîtorî kitabî kerdo bi enî vatişan qîmetê ene antolojî ardo ziwan: “Zazakî hînî bingeyê xo şidêneno û paweyê nuştoxanê neweyano. Heme wendoxî namzetê nuştoxîye yê û ê paweyê dawet û motîwasyonî yî. No antolojî hem yew dawet o hem zî çimeyê motîwasyonî yo.”

Harûn Bozkurt ke antolojî amade kerda ew jî bi enî vatişan mesela ardo ziwan: “Na xebata ke ma sey yew antolojîyê şîîranê zazakî amade kerd, ma waşt ke edebîyatê zazakî de tewirê şîîrî bi dewlemendîya senî yew şekl de aver şîya, şaîrê ke şîîranê xo sey karkerê zerrî senî yew şekl de bi huneranê xo ya neqş kerdê û heskerdoxê yê şîîranê ziwanê xo rê senî yew şekl de pêşkêş kerdê wendoxanê xo rê bimojenê.”

Harûn Bozkurt ka mo?

Harûn Bozkurt serey 1987 de dewa Çêrmûge Hesto de amew dinya. Balikesîrê Tirkiya de unîversîte, beşê mamostetî ay ziwanê tirkî wendo. Serra 2014 de Entab de dest bi mamostetî kerdo. Sera 2019 de Mayzanistê Ziwan û Kulturê Kurdan yê Unîversîteya Artûklûyî yê Mêrdînî de zazakî sero mastero bêtez qedêna û reyna eynî sere dest bi mastero bitezî kerd.

Ê heta enka kovara Şewçila, kovara Vateyî û rojnameyê Newepelî de niştey xo kerdê vila.

- Destpêk ra Heta Ewro Antolojiyê Şîîranê Zazakî / Harûn Bozkurt / Weşanxaneya Peywend / Şîîr / 435 rîpelî / 2021

***