Diyarname

KNK’ê ji bo Cejna Zimanê Kurdî daxuyaniyeke nivîskî weşand banga “Pêwîste bi her awayî û di her şert û mercan de, zimanê şîrînê kurdî di hemû qadên jiyanê de bê bikaranîn û parastin û li cîhanê jî zêdetir bê nasandin.”

Kongreya Neteweyî ya Kurdistanê (KNK) di daxuyaniya xwe de gotiye, “Bi minasebeta rojên 14, 15 û 16’ê Gulanê, em Cejna Zimanê Kurdî, li gelê Kurd pîroz dikin. Di nava civaka me de, ev sê rojên han wekî cejna zimanê kurdî hatiye naskirin û tê pîroz kirin.  Armanca vê bîreweriyê ew e ku gelê kurd bi giştî û ew kesên kurdziman bi taybetî xwedî li zimanê xwe derkevin û biparêzin.”

ZIMANÊ KURDÎ LAWAZ BÛYE

KNK gotiye li cîhanê her netewe xwedî rojên xwe yên taybet û bi nirx in, ew wan rojan wekî resentî û nirxên xwe yên neteweyî nas dikin û ev yek lê zêde kiriye, “Netewe bi wan bîreweriyan xwe şad û serfiraz dibînin û hebûna xwe xurtir û bi hêztir dikin. Lewre pêwîste gelê kurd jî mîna her neteweyekê resen û heyî xwedî li sembol, bîrewerî û boneyên xwe yên dîrokî derkeve, bi parêze, bilind û pîroz ragire. Heya ku civak, zimanê xwe di nav jiyana rojane de nede jiyandin, nikare hebûna xwe bidomîne û nasnameya xwe bi şêweyek zelal û bê kêmasî bide nîşandan. Ji bo vê ye ku dijmin û nehezên kurdan rastiya zimanê kurdî nas nakin û napejirînin. Mixabin! civaka me heya niha ev rastî wekî pêwîst nedîtiye, nas û fêm nekiriye. Civakê zimanê xwe di jiyana xwe ya rojane da bi şêweyek pêwîst nedaye jiyandin, vê bandor li pêşketina ziman kiriye, wisa kiriye ku zimanê kurdî li hember zimanên dagirkeran sist, lewaz û qelis bimîne.”

Di daxuyaniyê de hatiye gotin ku li ser vê rastiyê ew li ser navê Komîsyona Ziman, Çand û Perwerdeya Kongreya Neteweyî ya Kurdistanê (KNK), cejna zimanê kurdî pîroz dikin û dibêjin wateya qedexekirin, astengkirin û hewlên cudakariyê yên li ser zimanê kurdî tunekirina civakê bi xwe ye.

DEV JI NAKOKIYÊN XWE BERDIN

KNK’ê di dawiya daxuyaniya xwe de ev bang kiriye, “Bi vê boneyê em bang li tevahî partî, dam û dezgeh, saziyên fermî, saziyên civaka sivîl, kesayetî û hemû beşên civaka xwe dikin ku dev ji nakokiyên pûç, bê wate û bê sûd berdin; werin em bi hev re milê xwe bidin bin barê ziman, zimanê me di xeteriyê de ye. Dema ziman nema nasname jî namîne û vê çaxê hebûn û nebûna me weke netewe dikeve ber sekerata mirinê. Her tişt ji dest diçe. Pêwîste dest bi dest, nifş bi nifş ziman û bi wê ve girêdayî çand û perwerdeya bi zimanê kurdî pêşde bibin û xwedî lê derkevin. Google yê çend sal beriya niha, bi hewl û keda komek dilsoz û welatparêzan zimanê kurdî (Zaraveya kurmancî) xistibû di nava lîsteya wergera xwe de, di vê mehê de jî Google yê zaraveya soranî jî xiste lîsteya wergera xwe. Em vê pêşketin û vê bûyera dîrokî ku rastî rojên cejna zimanê kurdî tê, li gelê xwe pîroz dikin. Pêwîste bi her awayî û di her şert û mercan de, zimanê şîrînê kurdî di hemû qadên jiyanê de bê bikaranîn û parastin û li cîhanê jî zêdetir bê nasandin.”

***

Li ser ziman nûçeyên eleqedar ên van rojan:

-  Li 19 bajaran lêkolîneke li ser bikaranîna zimanê kurdî hat kirin

- Roja Ziman: Va ne bajar bi bajar çalakiyên ji bo ziman 

- Roja Ziman: Bernameya Stenbolê 

- Ji bo zarokan atolyeya ziman hat çêkirin