Diyarname

Helbestvanê navdar Feqîr Ehmed duh (30'ê adarê) saet 15,45'an de li Kolna Almanyayê ji ber têkçûka pişikê canê xwe ji dest da.

Helbestvan Feqîr Ehmed di sala 1939'yan de li gundê Mizeynterê ya Sirûcê (Pirsûsê) hatibû dine. Wî li dû xwe gelek dîwanên helbestan û gelek helbestên ku bûbûn stran hiştin û her wiha gelek çîrok hiştin û çû.
Yekem dîwana wî di sala 1990'î de bi navê "Dîwara Reş" hatibû çapkirin. Di  sala 1994 û 1998'an de berdewama heman dîwanê wekî du û sê hatin çapkirin. Feqîr Ehmed gelek çîrok jî nivîsandibûn.

Hunermendên kurd gelek helbestên wî kirin stran û belav kirin. Ya herî zêde tê zanîn "Rêya Kobanî" ye ku piranî wekî "Pêşiya Malê" jî tê zanîn. Aramê Dîgran ev amade kiribû, paşê Mehmet Atli jî di nav de gelek kesî ev stran xwendibû. Dîsa Dîkran ji helbestên wî yên wekî "Çûm Siya Darê", "Ey Welato" jî stran çêkiribûn. "Ey Şalûlê Min" jî têde hin stranên wî ji aliyê Koma Berxwedan ve hatibûn xwendin.

Ji ber xebatên wî, par payîzê Tevgera Çanda Demokratîk a Kurdan li Ewropayê (TEV-ÇAND) “Xelata Pênûsa Zêrîn a Kedê” dabû wî. Di merasima xelatdayînê de Xelîl Xemgîn wisa gotibû, "Mamoste Aramê Dîkran carinan di helbestan de hin guhertinên hûrik dikirin. Lê wî gelekî hez ji helbestên Feqîr Ehmedî dikir. Bi ya wî, ev helbest, helbestên welê bûn ku bi dinyaya kurd bi awayekî sade îfade dikirin. Ji ber wê, wî ji bo gelek helbestên Feqîr Ehmed ên wekî Çûm Siya Darê, Rêya Kobaniyê, Ey Welato muzîk çêkir û ew gotin.”

Feqîr Ehmed ê 84 salî ev 3 hefte bûn li Nexweşxaneya Holweide dihat dermankirin. 30'ê mehê canê xwe ji destda. Cenazeyê wî dê bişînin Sirûcê û li wir defin bikin.

Va ye ew stran "Pêşiya Malê"