Diyarname
Fontek dikare kesek bike serokdewlet? Fontek tu hildibijêrî der barê te de çi agahiyan dide? Gelo fontek Obama bir heta Qesra Spî? Ev pirs û gelek pirsên li ser fontan di pirtûka Simon Garfield de ne. Em qala pirtûka "Just My Type" dikin.

Pirtûka Garfield pirtûkek fontan e. Fontên ku her roj di kompîturan de, di dîzaynan de em bikar tînin. Pirtûk par di beşa "derveyî wêjeyê" de wekî pirtûkê herî serketî hatibû qebûlkirin. Heman pirtûk niha bi navê "Tam Benim Tipim" (Eynî Tîpa Min) li Tirkiyeyê bi tirkî hat weşandin.

"Tam Benim Tipim" pirtûkek tîpan (fontan) e lê wan fontan li bin hev rêz nake; na mesele ne ev e. Pirtûk li ser çîrokên rastîn hatiye sazkirin û bi kêf tê xwendin.

Ji çîroka dema Gutenberg yekemîn qaliba tîpa yekem çêkir; heta Steve Jobs ku di kompîturan de menuya fontan saz kir û "nexweşiya fontên serdema hemdem" çêkir; pirtûk çîrokên wisa û gelek çîrokên din ên bi jiyanê ve, bi fontan ve girêdayîne pêşkêş dike.

Yek ji fonta herî navdar Helvetica ye û pirsa helvetica çawa û çima hemû dinya fetih kir? IKEA fontê xwe guhart çawa bû sedema xirecirekê? Dibe ku fontekê Obama kiribe serokdewlet? Çima Art Decoya salên 30'an li Amy Winehouse tê? Ew çi hest e ku fontek dibe aîdê welatek, olek, serdemek, pîşeyek? Ji arambûna (bê)nasnamebûna fonta Ariel, heta cidiyeta pratîk a Times New Roman; heta sivikbûna Comic Sans ku mirovan aciz dike -di kampanyayê de bikaranîna wê hatibû qedexekirin- kî berpirs e?

Ew çi tişt e ku hemû posterên fîlman ên xirab bi Trajan têne çê kirin ku kes dest jê bernade? Fontên herî xweşik û herî nexweşik ên hemû serdemê kîjan in? Û pirsa dawî: Fontê ku tu hildibijêrî der barê te de çi agahî dide derdorê?
Bersivên van pirsan û gelek pirsên din di vê pirtûkê de hene.

Her wiha ji tabelayan heta menuyan, ji etîketa kincên li balafirgehan heta her tiştên mirov li wan dinêre bi awayekî ev pirtûk bersiva wan tiştan dide.