Kobanî

Dîwana Wêjeyê ya Bakur û Rojhilatê Sûriyeyê li Kobanî 2'yemîn Hefteya Wêjeyî da dest pê kirin. Mijara bingehîn a îsal Melayê Cizîrî ye.

Gelek rewşenbîr û wêjevanên herêmê tev li Hefteya Wêjeyî bûn ku li Xwaringeha Zanîngeha Kobanî dest pê kir

Di destpêkirina vê çalakiyê de Berdevka Dîwana Wêjeyê ya Bakur û Rojhilatê Sûriyeyê Narîman Evdikê axivî û destnîşankir ku lidarxistina mîna van çalakiyan li Kobanî xwedî wateyên sembolîk in ku di pêşxistina asta wêjeyî ya xelkê herêmê de rol dilîze.

'EM SÛDÊ JI HEV BIGIRIN'

Hevserokê Desteya Çand û Hunerê ya Rêveberiya Xweser a Bakur û Rojhilatê Sûriyeyê Murhef El Fehid jî wisa got: “Îro em li pêşberî firsendeke dîrokî ne ku asta beşdarên Hefteya Wêjeyî nas bikin. Ji bo wê divê em sûdê ji hev bigirin ku çanda herêmên cuda bi hev bidin nasandin.

Piştî axaftinan, semînerek bi navnîşan “Nasname û felsefeya Melayê Cizîrî” ji aliyê Arşek Baravî ve bi rê ve çû. Baravî balkişand ser rola mezin a ku Melayê Cizîrî di parastina nasnameya helbesta kurdî de lîstiye û çawa bingehên helbesta kurdî daniye, dema ku wêjeya kurdî bi tunekirinê re ji aliyê êrîşkeran ve rû bi rû mabû.

Piştî semînerê, beşdaran rola helbestvan Melayê Cizîrî di wêjeya kurdî de nîqaş kir.

Dûre helbestvanan Bahoz Şakir, Mîrxan Bekir, Vîgan Hîmo û Celal Rûmî berhemên xwe bi zimanên kurdî û erebî pêşandan.

BERNAMEYA ROJÊN WÊJEYÊ

Di Hefteya Wêjeyî de helbest, roman û rexne cih digirin. Di roja duyemîn de der barê nasnameya kurdî de di berhemên Melayê Cizîrî de dê paneleke diyalogî bê lidarxistin. Her wiha çîrok bi zimanên kurdî û erebî werin pêşandan. Di roja sêyemîn de jî, têkildarî roman û modernîteyê de semînerek bê dayîn, helbestên bi kurdî û erebî bên pêşandan. Di roja çaremîn de jî girêdayî pêşketina romanê di çend salên dawîn de dê panelek bê lidarxistin, çîrokên bi zimanên erebî û kurdî werin pêşandan. Di roja pêncemîn de jî, wê panelek li ser asta rexneyê û bandora wê li ser wêjeyê bê lidarxistin û çîrokên bi zimanên erebî û kurdî bên pêşandan. Di roja şeşemîn de der barê rola rexneyê de di pêşxistina wêjeyê de bêlidarxistin û dê çîrokên bi zimanên kurdî û erebî bên xwendin.

Çalakiyên Hefteya Wêjeyê her sal dê li bajareke kurdan li dar bikeve ku par li Qamişlo bû, îsal li Kobanî ye.

***

Nûçeya Eleqedar:

- Li Kobanî Hefteya Wêjeyê