Diyarname
Hunermend Şivan Perwer daxuyaniyeke weşand û da zanîn ku wî dixwest beşdarî şeva DTP’ê bibe lê derfet çênebûn.

Şeva DTP’ê ya li Berlîna Almanyayê di 31’ê gulanê de li dar ket. Yek ji vexwendiyan jî hunermend Şivan Perwer bû. Perwer ji ber ku ne li Almanyayê bû nikarî beşdarî şevê bibe û li ser vê yekê jî îro daxuyaniyeke nivîskî weşand. Perwer di daxuyaniyê de got ku ew ji 22’yê gulanê ve tevî heyeteke ji  Fonda Nawnetewî ji bo Çand û Hunera Kurdî çûbû Başûr û wiha berdewam kir: “Min gelek dixwest beşdarî vê şeva bi rûmet bibim, bes mixabin ji ber hevdîtinên girîng û kêmasiyen seferên balafiran yanî ji ber pirsgirêkên teknîkî nikarîbum beşdar bibim û berpirsiyarî û kemasiyê digirim ser xwe. Ji ber vê sedemê ji gelê me, dostan, hezkiriyên muzîkê ku beşdarî vê şevê bûne û komîta amadekar lêborîna xwe dixwazim.”
 
Her wiha Şivan Perwer gotiye ku tu alozî nîn e, ew her dem beşdarî şevên wisa dibe û wiha dawî li daxuyaniya xwe aniye: “Hêvî dikim ku kêmasiyên min bi wî awayî çênebin û ezê di dema pêşî de hewl bidim ku bêhtir bi berpirsiyarî nêz bibim. Silavên germ ji bo gelê me li Berlîn, heval û dostên DTP’ê.