Diyarname

Şêrwan Şêrwanî rojnamegerekî ye. Ev nêzî 4 salan in girtî ye û Dadgeha li Hewlêrê niha (20'ê mehê) çar salên din ceza lê birî. 

Ji 2020'î ve girtî ye

Di meha gelawêja 2020'î de li gor îdîayan bi daxwaza PDK'ê zêdetirî 80 rojnameger, çalakgerên civaka sivîl û mamosta li Herêma Behdînanê hatin binçavkirin. Piştî demek hin ji wan hatin berdan, hin hê jî girtî ne. Yek ji wan kesên girtî jî rojnameger Şêrwan Şêrwanî ye. Li Hewlêrê Dadgehê roja 16'ê reşemiya 2021'ê cezayê 6 salan a girtîgehê lê birî. Bi biryara Serokê Herêma Kurdistanê ev ceza hatibû kêmkirin. Li gor hesabê, rojnameger Şêrwanî divê meha rezbera îsal (meh û nîv paşê) bihata berdan lê Dadgeha Li Hewlêrê roja 20'ê tîrmehê 4 sal cezayeke din li Şêrwanî birî.

Çima îro?

Dadgehê îdîa kiriye ku wî "Sextekarî" kiriye. Bifikirin ku rojnamegerî ev du sal û nîv in girtî ye, carek lê ceza birine û hindik maye derkeve, niha cezayek din lê dibirî. Ger heba "Sextekarî" dema ew hat darizandin divê her du doz bihatana yekkirin û bi vî awayî ceza bihata dayîn. Yan jî ger dadgehek û sûcek din heye, wê çaxê çima ev du sal û nîv in ceza lê nehatiye birîn îro tê birîn? Û ev du sal û nîv in girtî ye, di dema ku ew girtî maye de "sextekarî" kiriye? Çawa sextekarî kiriye? Pirs gelek in.

'Cezakirina Şêrwanî dûrketina ji rêgezên azadiyê ye'

Mekteba Ragihandinê ya Yekîtiya Nîştimanî ya Kurdistanê (YNK) li ser cezakirina Şêrwanî bi daxuyaniyek got, “Cezakirina Şêrwan Şêrwanî dûrketina ji rêgezên azadiyê ye, azadiya fikir û azadiya rexne û weşanê li Kurdistanê di bin pirseke cidî de ye.”

YNK'ê wisa gotiye, "Azadiya fikir û azadiya rexne û weşanê li Kurdistanê di bin pirseke cidî de ye û raporên navnetewî yên rêxistinên mafên mirovan û rojnamegeriyê wekî berê rewşa azadiya Herêma Kurdistanê bi metirsîdar binav dikin."

'Dadgeha îstînafê bila biryarê betal bike'

Li aliyê din Tevgera Azadî jî daxuyaniyeke nivîskî belav kir û got, "Girêdayî doza Şêrwan Şêrwanî û hevalên wî yên di girtîgeha Hewlêrê de, wekî erkeke exlaqî û hiqûqî divê ev biryara nehiqûqî li Dadgeha Îstînafê bê betalkirin. Bi vê jî, ev bi kêmanî dikare şerma ku dadgehan li ser wan ferz dike, kêm bike.”

Waliyê Silêmanî dijî biryarê derket

Her wiha Waliyê Silêmaniyê Heval Ebubekir jî bi ser hesabê xwe yê Facebookê re got ku desthilatdar bixwazin yan nexwazin, bizanin di dosyeya Şêrwan Şêrwanî û hevrêyên wî de xelet in û wiha got: “Divê desthilatdarî, dadgeh û rêveberî bi ruhê kîn, nefret, tolhildan, nefêmkirin, ceza û mehkûmkirina bi meyla taybet, nêzîkatî û helwest raber neke û biryaran nede.”

Rojnameger Omêd Beroşkî dij biryarê derket

Rojnameger Omêd Beroşkî piştî biryara dadgehê dijî biryarê derketibû û duh bi vî awayî daxuyanî dabû çapemenî. Beroşkî ku di sala 2020'î de ew jî di nav kesên hatibûn girtin de bû û meha reşemiya 2022'yan hatibû berdan, rexne li dadgehê û rêveberiya Herêma Kurdistana Federe kir. Beroşkî piştî biryarê ji bo çapemenî wisa got, "Mesrûr Barzanî li ser yasayê ye û bi hişmendiyek polîsî 4 sal cezayê girtîgehê daye Şêrwan Şêrwanî.” Li ser vê yekê Beroşkî îro serê sibê hat binçavkirin, êvarkî hat berdan.