Diyarname

Xwişka siyasetmedar û Hevşaredara Amedê ya berê Gultan Kişanak Zeynep Ozer 8'ê mehê miribû. Kişanak ji girtîgehê birin ser gora xwişka wê. Lê di vegerê de Kişanak rastî kirinên îşkenceyî hat.

Mebûsa EMEP'ê ya Entabê Sevda Karaca ji ser hesabê xwe re got ku duh li Girtîgeha Kandirayê çûye sedana Gultan Kişanak, Fîgen Yuksekdag û Nurhayat Altun. Karaca silavên wan belav kir û tiştên hatine ser Kişanak wisa anîn ziman: "Dema hê nû xwişka wê defin dikin bi lez û bez wê vedigerînin girtîgehê. Kişanak dibêje qey dê bibin Balafirgeha Elezîze û ji wir bi balafirê bibin Stenbolê û dûre Kandira lê na; bêyî agahî bidinê dibin Girtîgeha Elezîzê. Dema çimaya vê dipirse jî dibêjin 'Ji bo cenazeyê 4 saet dem dane, ji ber vê yekê em te dibin girtîgehê'. Li cem Kişanak ne dermanên wê, ne tiştên wê hebûn. Dixwaze li odeya hevalên wê yên li girtîgeha Elezîzê bimîne, lê nabin wir, dibin cihek wekî embarê û qirêj. Kişanak şevê li wir derbas dike. Serê sibê dixwaze bi midûr re biaxive, destûrê nadin. Ji midûrê nobedar re dibêje, 'Hûn çawa mirov in, bêyî haya malbata min jî pê bixin we ez anîme vir, hûn mirovan direvînin? Ez dixwazim mafê xwe yê telefonê bikar bînim, dixwazim ligel parêzerê xwe biaxivim' Ew bersiva 'Em ne berpirs in, jendirmeyên te anîne gavek din dê werin'. Li ser israra Kişanak bi telefonê xeberê didin malbatê ku li Girtîgeha Elezîzê ye. Li ser vê parêzerê wê tê girtîgehê lê bi sedema 'Kişanak hikûmxwar e, vê nîvroyê hevdîtin çênabe' nahêlin parêzer here cem; saet û nîv didin sekinandin. Lê Kişanak ne hikumxwar e, ceza nexwariye, 7 sal in bi bêadeletî, ne hiqûqî tê darizandin."

Karaca diyar dike ku dema parêzer tê dîsa wê rojê bi lez û bez ji wir digirin, divê bibin Balafirgeha Elezîzê lê na, vê carê dibin Sêwazê ku sedem jî wekî "Balafir tune ye" nîşan didin. Karaca dibêje ku ligel lêçûyênên Kişanak berê dane jî, ev rêwîtî li wê kirine îşkence û piştî 7 saetên di erebeya rîngê de nû li Sêwasê siwarê balafirê dikin û dibin Kandirayê.