WAN
Li Wanê 45 saziyên sivîl ên civakî li hev kom bûn û operasyonên li dijî şaredar û rêveberên BDP'ê yên Wan û navçeyên Wanê şermezar kir.
Sekreterê Baroya Wanê Zekî Yuksel, diyar kir ku armanca operasyonê astengkirina xebat û xizmetên şaredariyê ne û xwest şaredar serbest bên berdan.

Yekîneyên Midûriyeta Polîsan serê sibê li navenda Wanê û navçeyên Wanê bi ser malên rêveberên BDP'ê, şaredarî û şaredaran de girt. Polîsan li Wan, Elbak, Bêgirê, Qelqelî, Artemêt, Sixke û Çardêranê bi ser malên rêveberên BDP'ê, şaredarî û malên endamên meclîsa şaredariyê û şaredaran de girt.
Di operasyonan Şaredarê Warê Bekir Kaya jî têde gelek şaredarên navçeyên Wanê û rêveberên BDP'ê hatin binçavkirin.

Piştî operasyonê Platorma Demokrasiyê ya Wanê ku ji 45 saziyên sivîl ên civakî pêk tê, li ber Mavî Plaza kom bûn û operasyon şermezar kir.
Nûnerên 45 saziyan piştî kom bûn heta Parka Feqiyê Teyran meşiyan û operason şermezar kirin. Komê di meşê de pankarta "Destê dirêjî şaredar dibin bila bişkên" û "li dijî faşizmê mil bidin mil" berz kirin.
Demekê polîsan xwest meşê asteng bike, lê komê di meşê de israr kir. Komê wêneyê Şaredar Bekir Kaya yê ku dema îro hate binçavkirin bilind kirin û meşiyan. Piştî meşê li Parka Feqiyê Teyran li ser navê komê Sekreterê Baroya Wanê Zekî Yuksel, daxuyanî da û wiha got: "Di 14'ê avrêla 2009'an de di bin navê 'KCK'ê de operasyona pêşî pêk hat. Wekî vê operasyonê îro jî li Wanê operasyon pêk hat. Di nava van operasyonan de ciwan, jin, siyasetmedar, rojnameger, hiqûqnas, doktor û hemû bejên civakê zêdeyî 8 hezar kes hatin girtin. Bi van operasyonan dixwazin xizmetên şaredariyan asteng bikin. Îro jî Şaredarê Wanê Bekîr Kaya û şaredarên din li dijî hiqûq û demokrasiyê hatin binçavkirin. Di rojên borî de Serokwezîr Erdogan gotibû 'Ez Wan, Amed û Mêrdînê dixwazim.' Piştî vê gotinê operasyon pêk hatin. Dixwazin xebat û xizmetên şaredariyê asteng bikin."

Yuksel, destnîşan kir ku bi van operasyonan pêvajoya aştî û demorasiyê zerarê dibîne û gotinên hikûmetê yên dawî faşizan in. Yuksel, da zanîn ku ji ber daxuyaniyên hikûmetê yên faşîzan ev operasyon zêde dibin. Yuksel, xwest operasyon bi dawi bibin û kesên hatine binçavkirin serbest bên berdan.