Xalid Etê / QAMIŞLO

7'emîn Pêşangeha Pirtûkan a Şehîd Herekol ku 28'ê meha pêşiya çûyî dest pê kiribû bi dawî bû. Li ser pêşangehê çi gotin? Me dîtinên hin kesan girtin.

Di pêşangehê de 60 weşanxane û saziyên çandî, ji wan 24 ji Bakur û Rojhilatê Sûriyeyê, 37 jî ji herêmên din ên Sûriyeyê, Urdin, Lubnan, Misir, Îmarat, bakurê Kurdistanê û Tirkiyeyê, başûrê Kurdistanê, Iraq û Îtalyayê beşdar bûn.

Par 51 weşanxaneyên xwecih û cîhanî beşdarî pêşangehê bûbûn lê îsal hejmara weşaxaneyên beşdar, zêdetir bû.

Di pêşangehê de 140 hezar pirtûkên bi zimanên kurdî (kurmancî, soranî û kirmanckî), erebî, farisî, tirkî, îngilîzî û fransî hatin pêşandan.

'ÎSAL JI PAR SERKETÎTIR BÛ'

Sumeya Mihemed ku mîna her sal îsal jî serdana pêşangehê kir û hin pirtûk kirîne, nêrînên xwe der barê pêşangehê de bi me re parve kirin. Sumeyeyê got: “Pêşangeha îsal ji ya salên berê serkeftîtir bû. Di pêşangehê de pirtûk û berhemên wêjeyî bi gelek zimanan, bi taybet zimanê kurdî, hebûn.”

Sumeye got herî zêde tiştê bala wê kişandiye ew bû ku malbatan bi hev re serdana pêşangehê dikir û wiha domand: “Pêşangeh û çalakiyên çandî platformên ronîkirina gelan in. Divê ne tenê salane bin, lê dibê mehane û dorveger bin da ku çanda zanist, xwendin û zanînê zêdetir belav bibe.”

‘PÊŞANGEHÊ WÊJEVAN Û REWŞENBÎR GIHANDIN HEV′

Ebdulhelîm Dawî yê ji Girkê Legê jî desntîşan kir ku pêşangeh îsal serkeftî bû û got: “Pêşangeh cihê kombûna rewşenbîr, xwîner û wêjevanan bû.”

Dawî pêşangehên berê bi bîr xistin û got: “Pêşangeh salên berê bi bernameyên xwe yên cur bi cur û civatên xwe yên çandî dewlemend bûn, lê em jê mehrûm bûn. Lê tevî wê jî em ji dûr hatin û kêfxweş in. Her wiha rojên wê jî kêm in û her kes nikare beşdar bibe.”

Dawî hêvî kir ku buhayên pirtûkan dakevin û diyardeya diyariyan zêde be, ji ber ku buha li pêş kirîna pirtûkan dibin asteng.

‘EM BEŞDAR BÛN, LÊ ME PIRTÛKEK NEKIRÎN’

Xwendekara sala yekem a Zanîngeha Rojava Zana Etê jî îşaret bi bilindbûna buhayên pirtûkan kir û wiha got: “Gelek kes beşdar bûn, lê ji ber buhayên giran zêde pirtûk nekirîn. Bi hêvî me buha kêmtir bin da ku em bikarin bikirin.”

“Me tenê li pirtûkan dinêrî. Pêşkêşiyên hunerî, pêşbirk û semîner tune bûn.” Bi van gotinan Zana pêşangeh wesif kir û got di aliyê dewlemendiya bernameyê de lawazî hebû.

′DIVÊ CIHEKÎ GUNCAWTIR JÊ RE WERE VEQETANDIN′

Endamê rêveberiya kovara Şermola Dilşad Murad serkeftina pêşangehê û dewlemendiya wê bi berhemên wêjeyî û berhemên jinan pîroz kir û ji aliyekî din ve jî got li gel asta pêşwazî û beşan cih ne gucaw e û hêvî kir ku pêşangeh di aliyê hejmara rojan de wekî berê be û lidarxistina wê li cihekî firehtir be.

‘SERKEFTINEKE MEZIN E′

Endamê rêveberiya Ebdullah Şêxo Weşanxaneya Neqiş ku weşanxaneyê nûnertiya 8 rolên weşanxaneyê li seranserê cîhanê di pêşangehê de kiriye dengê xwe tev li dengê Dilşad Murad kir û got divê cihekî fireh an jî holeke fireh ji pêşangehê re bihata veqetandin, da ku bi qonaxa pêşangehê gihaştiye re guncaw ba. Şêxo wiha got: "Lidarxistina pêşangehê di van rewşên dijwar de ku Rojava tê re derbas dibe bi xwe serkeftineke mezin e û girêdayî kesên li ser sekinînin û Rêveberiya Xweser e."

Şêxo hêvî kir ku pêşangeh gavên din ji bo pêşketinê pêk bîne û wiha domand: "Divê cihekî guncaw jê re were veqetandin û tiştên tên pêşkêşkirin cur bi cur bin. Ne tenê pêşandana pirtûkan be.”

'GAVEK NIMÛNE BÛ'

Li ser mijarê endama komîteya amadekar a pêşangehê û cîgira Hevserokatiya Desteya Çandê ya Bakur û Rojhilatê Sûriyeyê Ronahî Hesen axivî û wiha got: “Pêşangeh di aliyê beşdarbûn û berhemên wêjeyî de, pêngaveke nimûne û baş avêt. Dema pêşangehê jî ji ber rewşên heyî û êrîşên dagirkeriyê bû. Ev dem ji bo dewreyên din ne derbasdar e. Li kêleka wê jî di bernameya me de beşên hunerî û semîner jî hebûn, lê plansaziya pêşangehê nebû alîkar."

Ronahî Hesen got beşdariya zêde ya weşanxaneyan ji bo pêşangehê gaveke baş e û wiha dawî li gotina xwe anî: "Li gorî derfetan me wekî deste hewl da cihekî taybet ji pêşangehê re ava bikin, lê bi sedema derfetên kêm tu alternatîf ji bilî vê hole tune ne."

ANHA

***

Nûçeya Eleqedar:

- Li Qamişloyê Pêşangeha Pirtûkan dest pê kir 

- Li Qamişloyê Pêşangeha Pirtûkan li dar dikeve