Diyarname

Li gor bernameyê divê 25'ê reşemiya 2024'an li Herêma Kurdistana Federe hilbijartin çêbibe, lê niha hat ragihandin ku dê nikaribin wê demê hilbijartinê çêbikin.

Li gor nûçeya Rojnewsê Komîsyona Bilind ya Serbixwe ya Hilbijartinê ya Iraqê bi awayekî fermî Serokê Herêma Kurdistanê agahdar kiriye ku ew nikarin hilbijartinên Parlamentoya Herêma Kurdistanê di dema xwe de bikin.

Komîsyonê bang li Serokatiya Herêma Kurdistanê kiriye ku bi lihevkirinek demeke din ji bo hilbijartinên Parlamentoya Herêma Kurdistanê diyar bikin.

Piştî belavkirina vê nûçeyê, vê carê Berdevkê Komîsyona Bilind a Serbixwe ya Hilbijartinê ya Iraqê Cûman Xelawî daxuyanî belav kir. Xelawî diyar kiriye ku ji ber sê sedeman hilbijartinên Parlamentoya Herêma Kurdistanê hatin paşxistin ku ew jî qanûnî, darayî û teknîkî ne.

Cûmane Xelawî diyar kiriye ku Ji aliyê qanûnî ve, Dadgeha Federal ya Iraqê hê biryar li ser giliyê nedaye ku gelo wê sîstema hilbijartinên li Herêma Kurdistanê bi yek bazin, du bazin an jî bi çend bazinan bê kirin.  Xelawî got; “Ji ber vê mebestê jî roja 24’ê Çileyê/Rêbendanê Dadgeha Bilind ya Federal ya Iraqê wê careke din bicive û biryarê bide ku wê bi sîstemek çend bazinan bê kirin.”

Her wiha Xelawî diyar kir ku ji aliyê darayî ve hikumetê ji bo proseya hilbijartinan 70 mîlyar dolar veqetandiye, lê derengxistina mûçeyan bû sedem ku hilbijartin were paşxistin. Têkildarî sedema sêyemîn an ku teknîkî jî wisa got; “Sedema sêyem jî ew e ku ji aliyê teknîkî ve hilbijartinên Parlamentoya Herêma Kurdistanê gelekî nêzîkî hilbijartinên encumenên parêzgehan bû.”