___Cemil Oguz___
Pêşangeha Pirtûkên Kurdî ya Batmanê îsal di navbera 16-20'ê mehê de li dar dikeve. Hemû agahî û kîteyên li ser weşanxaneyê me bi dest xistin. Hema hema hemû weşanxaneyên kurdan beşdar dibin. Gelek nivîskarên kurd jî dê mêvanên Batmanê bin.
HEMA HEMA HEMÛ WEŞANXANEYÊN KURDAN
Pêşangeha Pirtûkan a Batmanê ji aliyê Şaredariya Batmanê ve bi hevkariya Arî-Der û Egîtîm-Sena Batmanê tê li dar xistin. Di warê organîzekirina weşanxaneyan de jî YEWKURD'ê (Yekîtiya Weşangerên Kurd) rol girtiye ser milên xwe.
Ji hemû pêşangehên li bajarên kurdan heta niha li dar ketine cudatir navê vê pêşangehê raste rast "Pêşangeha Pirtûkên Kurdî" ye. Loma jî nêzî 30 weşanxaneyên kurdan, hemam hema hemû li pêşangehê dê cih bigirin.
Hevşaredarên Batmanê Gulîstan Sonuk û Yeşîl Işik li ser pêşangehê gotin, “Ev pêşangeh ji bo jiyîn, pênasekirin û pêşxistina çand û zimanê kurdî gaveke girîng e ku hatiye avêtin. Ziman û çanda me ev bi hezaran salan e ku li ser vê axê dijî û bi bername û çalakiyên bi vî rengî wê xurtir bibe. Ji ber ku em li Batmanê mazûvaniya pêşangeheke wisa hêja dikin gelekî kêfxweş in. Em tevahiya gelê xwe vedixwînin vê pêşangehê.”
WEŞANXANEYÊN BEŞDAR
Di pêşangehê de wê sazî û weşanxaneyên ku bi kurdî pirtûkan çap dikin standê vekin. Li gor agahiyên me bi dest xistine weşanxaneyên (li gor rêza alfabetîk) Aram, Aryen, Ava, Avesta, Azad, Belkî, Bêjing, Dara, Delal, Deng, Doz, J&J, Ma Music, Mezopotamya, Morî, Na, Nûbihar, Pall, Payîz, Peywend, Ronya, Sar, Sîdar, Sîtav, Vate, Wardoz, Weqfa Beşîkcî, Zîlan, Zîz wê li fûarê amade bin û standê vekin.
GOTÛBÊJÊN PÊŞANGEHÊ
Di pêşangehê de bi dehan nivîskarên kurd dê pirtûkên xwe îmze bikin. Ji bilî van dê gelek gotûbêj jî li dar bikevin. Me ew dan hev:
16'ê Kewçêrê: 
- Serpêhatiya Romûnûsekî / Moderator Xalid Sadînî, Axifger Omed Dilsoz / Saet 15.00 / Amadekar Peywend
17'ê Kewçêrê:
- Têkiliya helbesta klasik û helbesta modern / Moderator Kamûran Demîr / Axifger Dilbirîn Dilo / Amadekar Bêjing / Saet 15.00
19'ê Kewçêrê:
- Rengvedana evîn û bergiriya welat di şiîra modern a Bakur de / Moderator Emînê Botî, axifger Berken Bereh / Amadekar Avesta / Saet 15.00
- Çîroka Heskîfê / Moderator Dr Veysi Ayhan, Axifger Recep Kavuş / Amadekar Na / Saet 16.00
20'ê Kewçêrê:
- Di helbestê de bîr û nasname / moderator Bawer Erîşen, axifger Leyla Mexso Berazî / Amadekar Avesta / saet 15.00
- Têkiliya felsefe û perwerdehiyê û perwerdehiya bi zimanê kurdî / Axifger Dr. Ubeydullah Pilatin / Saet 16.00

Not: Hemû gotûbêj li Eymana Egîtîm-Senê li dar dikevin. Ger me gotûbêj yan jî navên weşanxaneyan ji bîr kiribe, xêra xwe me agahdar bikin. Emê lê zêde bikin.

***

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.

***

"3 Deqe ligel Cemil Oguz"