___Dilyar Amûdî___

Stranên kurdî her behsa remûsanê dikin û hindiktir be jî behsa lêvan jî dikin.  
Niha gava min ev lêkolîn dît, min ji xwe pirsî, gelo mebest di wan stranan de "French kiss" e yan na?? 
Nizanim wisa mejiyê min sekinî û nayê bîra min bê di stranên me yên gelêrî de wisa qala wê hûrgiliyê bûye yan na.  
Gelo kurdan berê maçî lêvan dikir? 7 mîlyon sal bere kurdan çawa maçî dikir?
Nizamim lê di vê lêkolînê de dibêjin ku zanistvanan koka ramûsan an maçîkirinê derxistiye.  Dîroka maçîkirinê birine 7 mîlyon sal bere.
Li gorî wê, heger hûn bizanin bê ka maçîkirin ji ku hatiye ew ê mûyên laşê we rabin, berî ku hûn maçî kesekî/ê bikin hûn ê hezar carî bifikirin.  
Profesor Adriano Lameira, dibêje maçîkirin bi eslê xwe vedigere mîlyonan salan bo dema bav û kalên me yên bi pirç. 
MAÇÎKIRIN VEGUHERÎ WATEYA SEKSÎ
Li gorî angaşta wî, derxistina lêvan bi pêş ve û mijandina bi lêvan teknîkeke gelekî jîrane bû ji bo ku spî û "qijnik"an ji nav pirça hev derxin. Yanî pêşî tenê ji bo paqijiyê bû û paşê veguhezî wateyeke seksî. Lê gelek teoriyên din jî hene.
Hinek dibêjin ku maçîkirin amûreke xurtkirina pergala bergiriyê ye gava ku em bakteriyê bi xwe didin hev, û hinek dibêjin awayekî danûstendina civakî wekî “bêhnkirin"ê ye. 
Yanî ev hîpoteza bi navê "maça dawî ya paqijkerî" pêşniyar dike ku maçîkirin bixwe ji adeta hevpaqijkirinê hatiye. Wekî çawa niha heywan dikin muhtemelen gava hev dialêsin. Lê wisa nefikirin ku ev paqijkirin ku ji lêvan pêk dihat. Na, wan bav û kalan laş giştik maç dikir û axir diçûn lêv û devan.  Bi demê re pirça me kêm bû lê çêja lêvan ma û dev jê bernede. 
7 MÎLYON SAL E EM HEV DIMIJIN, MAÇÎ DIKIN
Lameira wisa dibêje ku ev meseleya mijandina pirçê berî 7 mîlyon salan dest pê kiriye. Anku ev 7 mîlyon sal in em hev dialêsin, dimijin û maçî dikin. Lê te dît, em kurd hez dikin ji welatê xwe re bibêjin Mezopotamya tevî ku Kurdistana me ji Mezopotamyayê mezintir e û Mezopotamya jî ji Kurdistana me. Lê wisa xuya ye ku kevintirîn delîl an berjeng li ser maçîkirinê li Mezopotamyayê hatiye dîtin. Nabêjin li ku derê wê ye. Hin tekst hatine dîtin ku vedigerin 2 hezar û 500 salî berî niha. 
Prof. Lameira dibêje çi macên ser dêman bin, çi maçên dînî yên li ser destan, giştik di bingeha xwe de ji paqijkirinê tên. Lê çawa maçîkirin bû xwediyê wateyeke seksî hîn jî spekûlatîv e. Tiştê din ê ku pêwîst e bê ravekirin ka çima maçîkirin û seks bi hev ve hatine girêdan.  
LÊV GULYAZÊN YARÊ
Erê min bersiva vê pirsê neda, "gelo ka berê maçî lêvên hev dikir an na?" Lê mirov dikare li stran û helbestan binêre ka me çawa li maçîkirinê dinêrî.
Bi kurtasî maçên ji lêvan xweş in, nexasim ew lêv gulyazên yareke ciwan bin.

***

Nivîsên Dilyar Amûdî yên ku berê di Diyarnameyê de hatine weşandin:
- Tirkî dikare bi kurdî loma ‘em ders dixebitin’
- Kurd, korona û makarna, ligel pivazan
- Putin gotiye ez ê mala bavê Tirkiyê bişewitînim!