AMED
Weqfa Mezopotamyayê ji bo gihandina berhevkaran, bi beşdariya folklorîst û akademîsyenan qursa xwe ya heştan dê onlîne li dar bixe. Serlêdanên qursê îro dest pê dikin û heya 15'ê sermawezê wê berdewam bikin. 
Weqfa Mezoptamyayê, 11 sal in li ser ziman û folklora kurdî kar dike. Weqf di vê çarçoveyê da her sal ji bo gihandina berhevkaran li ser folklora kurdî bi beşdarîya gelek folklorîst û akademîsyenan qursan li dar dixe. Her wiha kovara bi navê “Folklora Me” û “Folklor û Ziman” derdixe. Xwendekarên beşdarî van qursan dibin û sertîfîkayan distînin dest bi berhevkarîyê dikin. Xebatên berhevkar amade dikin ji alîyê Weqfê ve têne çapkirin. 
Weqfa Mezopotamyayê heta niha heft (rûbirû-onlîne) qurs lidarxistine û bi dehan berhevkar gihandine. Vê carê jî Weqf qursa xwe ya heştan dê onlîne li dar bixe. Ev qursa heştan dê di navbera 20'ê sermawezê û 22'yê berfambara 2024'an de onlîne bê lidarxistin. Serlêdana qursê di 30'ê kewçêrê de dest pê kirin û heya 15'ê sermawezê dewam dikin. 
KESÊN DÊ DERSAN BIDIN
Qurs onlîne, 4 hefte ne, hefteyê çar roj in û êvarê tê dayîn. Kontejana qursê bi 100 kesî bisînorkirî ye. Ramazan Pertev, Hîkmettîn Atli, Eşref Keydani, Gulê Şadkam, Tekîn Çîfçî, Mehmet Yildirim Çakar, Zeyneb Yaş, Omer Delîkaya, Bahoz Baran, Rêdî Seîd, M. Emîn Îşî û Celîlê Celîl dê dersan bidin. Kesên dixwazin tevlî qursê bibin, berî dîroka serlêdanê derbas bibe, heta 15'ê sermaweza 2024'an divê li ser malpera Weqfa Mezopotamyayê bi awayekî onlîne serî lê bidin.
Beşdar di pêvajoya perwerdeyê de, dê hînî rê û rêbazên berhevkirina folklorê, mijar, cure û teorîya folklorê, di folklora kurdî da hekîmîya gelêrî, şairî û dengbêjî di edebîyata devkî de, teknîka qeydkirinê, arşîv û dijîtalîzekirina muzîka kurdî, rê û rêbazên deşîfrekirina berhemên edebîyata gelêrî û nexşerêya xebatê ya monografîya gundan bibin. Dersdarên kursê tev ji akademîsyen û mamosteyên pisporên folkorê pêk tên û xwedî tecribeyên bi salan in. 
SERTÎFÎKA WÊ BÊ DAYÎN
Piştî perwerdeyê, kesên heqê wergirtina sertîfîkayê bi dest xistibin, dê sertîfîkayên wan bê dayîn û bi awayekî pispor bikarin derkevin sehayê bi profesyonelî karê behevkarîyê bikin. 
Weqfê, gihandina berhevkaran û berhevkirina keresteyên folklorê xistiye nava armancên xwe yên pêşîn û her sal dê qursên folklorê bi awayekî rêkûpêk li dar bixe. 
Xalên Girîng ji bo Serlêdanê:
1. Ji bo serlêdanê divê forma serlêdanê, bêyî kêmasî bê dagirtin. Ji bo ku hûn bikarin dagirin divê pêşî hûn qeyda endamtîya xwe çê bikin. Ji bo qeyda endamtîyê lînka jêrîn bitikînin:
https://online.wmezopotamyaye.org/
2. Serlêdan dê heta 15.11.2024'an bên qebûlkirin.
3. Kesên ku hatine qebûlkirin yan jî nehatine qebûlkirin dê di 18.11.2024'an da bên dîyarkirin. Ders dê di 20.11.2024'an da dest pê bikin.
4. Ji bo mafê wergirtina sertîfîkayê, divê kursîyer bi kêmanî beşdarî ji sedî (%80) heştêyî dersan bibin.
5. Yên ku carekê tevlî kursa folklorê bûne careka din nikarin tevlî bibin. (ji bo pêşî li hevalên nû bê vekirin.)
6. Kurs bê pere ye.
* Ji bo pirsên xwe hûn dikarin xwe bigihînin vê hejmarê:
Tel-WhatsApp: +090 (549) 440 2220
MA