Diyarname
8'emîn Fûara Pirtûkan a Amedê ku ji aliyê TUYAP'ê ve bi piştgiriya DTSO û hevkariya YEWKURD'ê li dar dikeve, vê sibê li Navenda Kongre û Fûaran a Amedê deriyên xwe vekir.
Di fûarê de li dor 30 weşanxaneyên kurdan bi giştî bi ser 200'î de weşanxane û saziyên sivîl cih digirin. Fûar heta 8'ê berfanbarê dê vekirî be.
Di merasima destpêkirina fûarê de Serokê TYB'ê (Yekîtiya Weşangerên Tirkiyeyê) Kerem Kocaturk diyar kir ku piştî salan ew dîsa li Amedê fûarê lidar dixin û got, "Ev fûar ne tenê fûara vir, fuara bajarên derdorê ye jî."
Serokê DTSO'yê Mehmet Kaya jî wisa got, "Hin fûar hene bajar bê wan çênabe. Fûara pirtûkan li vî bajarî tê. Ev der bajarek e ku helwesteke wê ya polîtîk heye. Ev yek jî bi xwendinê dibe. Fûara pirtûkan her sal wekî şahiyeke li dar dikeve."
Kaya diyar kir ku her sal 500 hezar mêvan tên, par 514 hezar hatin, îsal hedefa wan bilindtir e, ew li benda mîlyonek mêvanî ne.
Hevşaredara Bajarê Mezin a Amedê Serra Bucak jî di axaftina xwe de diyar kir ku pêdivî bi atmosfereke bê sansür heye û got ku ji bo sala bê dê navenda fûarê baştir bikin. Bucak wisa got, "Ji ber pirsgirêkên aboriyê weşanxane di nav qeyranê de ne. Mixabin Pirtûkxaneya Mehmed Uzun a li Sumerparkê ne di asta bikaranînê de ye. Di 8 salên kayûmê de bajar ji aliyê pirtûkxaneyan ve ne li ciheke baş e. Bila fûara me ji bo bajarê me ser xêrê be."
Di fûarê de gelek çalakiyên çandî wekî gotûbêj û panel hene. Nivîskarên kurd jî li standan pirtûkên xwe îmze dikin.
***
Nûçeyên Eleqedar:
- Va ne hemû çalakiyên weşanxaneyên kurdan (Fûara Amedê)
- Nêzî 30 weşanxaneyên kurdan ên dê herin Fûarê Pirtûkan a Amedê diyar bûn
.jpg)
.jpg)
