Diyarname
Li Amedê li ber Sûrên Amedê bi beşdariya Bi beşdariya Hevserokê Giştî yê DEM Partiyê Tuncer Bakirhan, Hevserokên Giştî yên DBPê Keskîn Bayindir û Çîgdem Kiliçgun Uçar, Hevserokê Kongreya Civaka Demokratîk (KCD) Berdan Ozturk, aktîvîsta TJAyê Hulya Alokmen Ûyanik, parlamenterên DEM Partiyê Mehmet Kamaç û Sînan Çîftyurek deklerasyona Newroza 2025'an hat eşkere kirin. ÎSal diruşma "Newroza Azadiyê" Newroz dê bê pîroz kirin.
Di deklerasyonê de gotin "Newroz ji bo gelê kurd navê berxwedan, azadî û zayînê ye. Her çiqas dewlet hewl didin vê wateyê bixin nava çarçoveyeke teng jî, rastiya Newrozê berxwedan û azadî ye" û wiha dom kir, "Gelê kurd bi sedsalan têkoşîna xwe di agirê Newrozê de geş kiriye, di vî agirî de hebûn, berxwedan û azadiya xwe nîşan daye. Newroz îro îfadeya herî xurt a meşa azadiya gelê me ye. Ji ber vê yekê her dengê ku ji qadên Newrozê bilind dibe, her agirê ku tê vêxistin, her strana ku tê gotin, her govenda ku tê girtin îradeya parastina azadiya me ye. Wateya herî mezin a zindîkirina rihê Newrozê îro di çarçoveya azadiya gelê kurd de berfirehkirina têkoşîna aştî û civaka demokratîk e."
Di deklerasyonê de bal kişandin ser banga Rêberê PKK'ê Abdullah Ocalan a roja 27'ê reşemiya 2025'an û gotin, "Em ê vê bangê bi heqîqeta azadiyê ya Newrozê re bikin yek û careke din nîşan bidin ku em dikarin bi hev re jiyana azad û wekhev ava bikin."
Di deklerasyonê de banga azadiya fîzîkî ya Ocalan kirin û dûre wisa gotine, "Ev banga jiyaneke adil û wekhev a gelan, baweriyan, jinan, ciwanan, zarokan, kedkaran û teqawidan divê bi ked û têkoşîna her kesî bê bilindkirin. Azadî û şoreşa jinan a ku bi têkoşîna Rehşanan, Ronahiyan, Zekiyeyan, Bêrîvanan vejiyaye, îro jî bi felsefeya Jin Jiyan Azadî bûye agirê Newrozê. Têkoşîna jinan a li dijî polîtîkayên mêtînger ên şerê taybet, li djî desthilatdariya mêrperest û netew-dewlet dê di avakirina aştî û civaka demokratîk de berpirsyariya herî mezin bigire ser milê xwe û civakîbûna aştiyê birêxistin bike û biparêze."
Her wiha bal kişandine ser rewşa Rojava û wisa hatiye gotin, "Şoreşa Rojava ronkahiya îro ya rihê azadiyê yê Newrozê ye. Pergala demokratîk a ku li Rojava hatiye afirandin, civaka neteweya demokratîk a li ser esasê azadiya jinan û wekheviya azad a gelan hatiye avakirin. Pergala Rojava wekî Newrozê sembola berxwedan û zayînê ye. Lê mayîndekirina van destkeftiyan û mîsogerkirina siberoja gelê me tenê bi berfirehkirina têkoşînê pêkan e. Mîna agirê ku Kawayê Hesinkar li dijî Dehaqê zalim pêxist, îro jî rêya parastina şoreşa Rojava, bilindkirina meşaleya têkoşînê ye. Cewhera Newrozê îradeya gelan a jiyana bi hev re, azad û wekhev e. Newroz îfadeya ziman, reng û baweriyên cuda ye ku li ser jiyaneke wekhev û hevpar dicivin. Ji ber vê yekê jî Newroz rastiya dîrokî ye ku her cudahî dikarin li hev bicivin. Civaka demokratîk û aştiya bi rûmet, bi ruhê berxwedanê yê Newrozê mezin dibe. Îro rêya herî xurt; hembêzkirina van nirxan, mezinkirina têkoşîna rêxistinbûyî, avakirina civaka demokratîk û misogerkirina yekîtiya neteweyî ye."
Di dawiya deklerasyonê de gotine,"Newroza 2025'an dê bibe qonaxa mezinkirina berxwedan û azadiyê, dê civaka demokratîk bê avakirin û têkoşîn dê pêş bikeve" û wiha dawî lê aNîne, "Agirê Newrozê dê bi rihê yekîtiya neteweyî, bi dengê bilindkirina azadiya fîzîkî ya Birêz Ocalan û têkoşîna mayîndebûna şoreşa Rojava geştir bibe. Em Newrozê li Birêz Ocalan pîroz dikin ku wî hewl da Newrozê bi pêvajoyeke wiha watedar pêşwazî bike û em hêvî dikin ku gel bi coşa Newrozê li hev bicive. Em ciwan, jin, kedkar û hemû gelê xwe bi kelecana azadiyê vedixwînin pîrozbahiyên Newrozê. Newroz qada hêza herî xurt a têkoşînê ye. Em bi ruhê azad ê Newrozê, Newroza hemû gelê xwe pîroz dikin. Newroz pîroz be…”
***
Nûçeya Eleqedar:
.jpg)
