Nota nû: Dengdana ji bo Helebçeyê ji bo hefteya pêşiya me hat hiştin. Biryar e roja sêşem an çarşemê dengdan çêbe. (ev not 26'ê mehê li nûçeyê hatiye zêdekirin)

Diyarname
Ji bo ku Helebçe jî bibe parêzgeh pêşniyar ji bo Parlemena Iraqê hatibû kirin. Rûniştina îro bi encam nebû, sibê dê dîsa rûniştin li dar bikeve.

Li Iraqê parêzger (walîtî) xwedî rayeyên bilind in. Li Iraqê 18 parêzgeh hene, ji van 3 jê di nav Herêma Kurdistana Federe de ne: Hewlêr, Duhok û Silêmanî. Kerkük jî parêzgeh e, walîtî di destê kurdan de ye lê ne di nav Herêma Kurdistana Federeyê de ye. Niha Helebçe jî mimkûn e bibe parêzgeh. Serjimariya Helebçeyê 135 hezar kes e. 

Li gor bernameya kar a Parlamentoya Iraqê diviya îşev saet 20:00’an de projeya yasaya parêzgehbûna Helebceyê bikeve dengdanê. Lê ji ber temamnebûna hejmara yasayî ya parlamentoyê, dengdan ji bo rûniştana sibê hat paşxistin.

Li gor agahiyan, du caran zengila ketina hindir hatiye lêdan lê ji ber temamnebûna hejmara yasayî ya parlamentoyê, nekarîne dengdanê li ser projeya yasaya navborî bikin.

Sibê dê dîsa dengdan çêbe. Ger Helebçe jî bibe parêzgeh piştî Duhok, Hewlêr, Silêmanî û Kerkûkê dê bibe parêzgeha pêncan ku di destê kurdan de ye.

Aliyek din a vê meseleyê jî ev e: Waliyên parêzgehan bi hilbijartinê têne ser kar. Li Hewlêr û Duhokê walî di destê PDK'ê de ne.. Li Silêmanî û Kerkûkê jî walî ji YNK'ê hatiye hilbijartin. Helebçe bibe bajêr, li wê derê jî dê Walî bikeve destê YNK'ê. Niha Helebçe wekî navçe derbas dibe.