Qamişlo
Heyva Sor a Kurd û Komîna Fîlman a Rojava li ser keda ajokarên ambûlansan ên din şerê Reqayê de belgefîlmekî çêdike.
Şerî li Reqaşê di navbera 6’ê pûşperê û 20'ê kewçêra 2017’an li dar ket. DAIŞ'ê Reqa wekî paytexta xwe ragihandibû. Hêzên Sûriyeya Demokratîk ew ji Reqayê qewirandin û Reqa rizgar kirin. Di dema vî şerî de ajokarên ambulansan ên di bin banê Hevya Sor a Kurd de, bê tirs berê xwe dan qadên şer û zarok, jin, mêr, şervan û heta çeteyên DAIŞ’ê yên birîndar jî xelas kirin. Di wê demê de 70 xebatkarên Heyva Sor a Kurd (bijîşk, hemşîr-hemşîre, ajokar) bi 10 ambulansan kar dikir. Niha li ser keda wan belgefîlmekî tê çêkirin.

'ME XWEST KEDA WAN NÎŞAN BIDIN'
Xebatkara ragihandina Heyva Sor Medya Xanim û ajokarên ambulansên şerê Reqayê senaryoyekê dinivîsin. Medya Xanim li ser vê yekê ji bo ANHA'yê wiha gotiye, "Reqa paytexta DAIŞ’ê bû, şerekî pir giran li wir dihat kirin. Li wir DAIŞ şikest û mirovahî bi ser ket. Heyva Sor jî kedeke pir mezin da. Ajokarên ambûlansan ku temenê wan mezin jî bû, dema gelek kes ji şer direviyan, ji bo jiyana mirovan rizgar bikin, zarokên xwe li pişt xwe dihiştin û bi dilxwazî berê xwe dida nava şer. Her cara em li hev rûdiniştin, wan bîranînên xwe vedigotin. Me jî xwest keda wan nîşanî her kesî bikin.”

BELGEFÎLMÊ DOKUDRAMA
Derhênerê fîlmê û endamê rêveberiya Komîna Fîlman a Rojava Yilmaz Mihemed Elî diyar kir ku wan di 24’ê rezberê dest bi kişandina fîlm kir û heta 5’ê kewçêrê bi dawî kir. Ev cara yekem e li Rojava belgefîlmek dokudrama tê çêkirin ku bûyerên ji nû ve zindî dikin.
Belgefîlm di asta montajê de ye û piştî xilas bibe pêşî dê nîşanî xebatkarên Heyva Sor a Kurd bidin.