Harûn Hêvî - Êrîvan

Kurdên li Ermenistanê dijîn ku ji sala 1941'ê ve perwerdehiya kurdî ya bi tîpên Krîlî dibînin, piştî têkoşînek demdirêj, di sala 2010'an de mafê perwerdeya kurdî ya bi tîpên Latînî bi dest xist. Dewleta Ermenistanê îsal ji bo perwerdeya kurdî ya bi tîpên Latînî ji dibistana seretayî heta amadeyî fon veqetand.

Li Ermenistanê bi awayeke fermî perwerdeya kurdî ya bi tîpên Latînî îro dest pê kir. Ev demek dirêj bû ku li Ermenistanê dersên bi kurdî bi tîpên Krîlî dihatin dayîn. Perwerdeya Kurdiya Latînî bi fermî li dibistanên gundên kurdan ji dibistana seretayî heta amadeyî hate destpêkirin.

Îro li gundê Elegezê yê herêma Axbaranê ya Ermenistanê, perwerdeya zimanê kurdî ya bi tîpên Latînî bi merasimekê, bi beşdariya Serokê Mamosteyan, mamosteyên dersan, Berdevkê Qeymeqamê Axbaranê dest pê kir.
Dewleta Ermenistanê di sala 2010'an de perwerdeya kurdî ya bi tîpên Latînî qebûl kiribû, lê ji ber piştgiriya aborî nehat dayîn, ders tenê di pûlên 1 û duyem de dihatin dayîn.

Bi vî awayî dê ji îro û pêve li dibistanên Elegezê bi tîpên kurdî yên Latînî dersên bi zaravayê kurmancî bên dayîn. Îsal, dewleta Ermenistanê fon ji bo dibistanên kurdan ên bi tîpên Latînî veqetand û pirtûkên bi zimanê kurdî zaravayê Kurmancî hatin derxistin. Pirtûkên dersan ji aliyê nivîskar û helbestvanê kurd Elîxanê Memê ve hatin amadekirin.

Di merasima vekirina dibistanê de Serokê Şêwra Kurdên Ermenistanê Kinyasên Hemîd axivî û got ku ev demek dirêj e ku li Dewleta Ermenistanê bi zimanê kurdî, ango bi zaravayê kurmancî, ji dibistanên seretayî heta amadeyî ders tên dayîn. Kinyasê Hemîd bi bîr xist ku li Ermenistanê dersên kurdî bi tîpên Krîlî dihatin dayîn û wiha domand: “Di van sê salên dawiyê de bi awayek fermî tîpên kurdiya Latînî ji aliyê dewletê ve hate qebûlkirin. Ji vir û şûn de dê bi tîpên Latînî perwerdeya kurdî bê dayîn.”

Piştî Kinyasê Hemî, Seroka Komîteya Kurdistanê Jenya Qadir jî axaftinek kir û malavahiya kesên ku pirtûkên kurdî yên dersan amade kirine û got; “Ez hêvîdar im ku midûr û dersdarên ku li vir amade ne dê hewl bidin ku zarokên me hînî zimanê wan ê dayikê bikin û ev zimanê me dê di pêşeroja me de be bibe wesîleya yekîtiya di nava gelê me de.”

Nivîskar û helbestvanê kurd Elîxanê Memê jî axaftinek kir û şanaziya xwe ya li hemberî vê pêngavê anî ziman. Memê ku ji bo zarokan pirtûkên kurdî yên bi tîpên Latînî amade kiriye, kêfxweşiya xwe anî ziman û diyar kir ku ew ê hewl bidin ku xwe bi rêya malperên înernetê û televîzyonan bigihînin hemû parçeyên Kurdistanê.

Memê bang li kurdên Ermenistanê û hemû kurdên li Kafkasyayê dikin ku piştevaniya van dibistanan bikin û xwe bigihînin hev.

Ji ANF'ê hatiye girtin