Çemçemal
Li bajarokê Çemçemalê, bi amadebûna hejmarek ji kesayetiyên Germiyan, Çemçemal û Kurdistanê, xelatên rûmetê pêşkêşî hejmarek ji hunermendên neteweyî hatin kirin. Di nav van de hunermêndên ji Rojava jî hebûn.

Li baregeha Komeleya Rewşenbîrî û Civakî ya Yarsan merasîma rêzgirtin û rûmetê ji bo hejmarek hunermendên netewî yên kurd hate lidarxistin û hunermend hatin xelatkirin.

Di destpêka merasîmê de, Serokê Komeleya Rewşenbîrî û Civakî ya Yarsan, Herêm Kakeyî axivî û got; “Îro em li baregeha Yarsan kom bûne. Em dixwazin ji dijminên xwe re bêjin ku sînorên çêkirî yên ku we hêvî dikirin hêdî hêdî çêdibin hatin rakirin û di vê çarçoveyê de, îro hunermendên ji Rojava, Bakur û Başûr li vir in û em dixwazin xelatek bidin wan.”

Piştre hunermend Luqman Selîm axivî û got; “Ez kêfxweş im ku îro li Çemçemalê me. Şoreşa Rojava xalek mezin a werçerxê bi xwe re anî. Di seranserê dîrokê de, kurd qet wekî niha yekgirtî nebûne. Şoreşa Rojava sedema vê yekîtiyê bû.”

Her wiha Luqman Selîm da zanîn ku wan di serdana xwe ya Rojava de, dema ku ew bi rêveberên navdar ên Rojavayî re civiyan, kêfxweşiya xwe ji bo piştgiriya Başûr, bi taybetî Silêmaniyê, ku piştgiriyek baş ya Rojava bû, anî ziman.

Her wisa Serokê eşîra Lek Cûma Kiwêxa Elî, di merasîmê de axivî û got ku hunermend têkoşîna xwe bi hunera xwe dimeşînin, huner jî beşek ji têkoşîn û berxwedanê ye.

Hunermend Delîl Mîrsaz jî li ser navê hemû hunermendên Rojavayê Kurdistanê silavên xwe pêşkeşî beşdaran kir û got; “Em bi rihê germ ê Şoreşa Rojava li vir amade ne. Rihê başûrê Kurdistanê li rojavayê Kurdistanê guhertinek mezin çêkiriye.

Her wiha Hunermend Nesrîn Botan di merasîmê de strana ‘Jin Jiyan Azadî’ pêşkêş kir û di dawiya merasîmê de, xelatên rêz û rûmetê pêşkêşî hunermendan hat kirin. (Rojnews)