SALİH FIRAT - HEWLER

Hevserokê PYD’ê Salîh Muslim du hêzên leşkerî yên ku hinek partî li rojavayê Kurdistanê ferz dike red kir û got: “Her kes dizane ku hebûna du hêzên leşkerî yên cuda dibe sedema xwîna birayan.” Muslim bertek nîşanê girtina deriyê sînor ya ji aliyê merciyên başûrê Kurdistanê ve hatiye girtin di û got ev biryar gelê Rojava ceza dike.

Li ser vexwendiya rêxistina Demokratîkbûn û Aştiyê ya Navnetewî (DPI) hevserokê PYD’ê Salîh Muslim çû başûrê Kurdistanê. Muslim pevçûnên dawî, gengeşiya navbera PYD û SPDK'ê û girtina deriyê sînor yê Sêmal a başûrê Kurdistanê nirxand.

Muslim diyar kir ku ew li ser vexwendinê hatine Başûr û got tevli civîneke ku gelek rêxistinên kurd jî tevlibûne bûye.

Muslim diyar kir ku rêxistina aştiyê ya mijara gotinê ye bi rêxistinên muxalfeta ereb re jî di nav têkiliyê de ne û got: “Ji ber vê ev civînek girîng e. Lê me bi taybetî pirsgirêk û naqokiyên navbera rêxistinên kurd nîqaş kir. Hêviya me ev e ku ji bo çareseriya pirsgirêkan pêngav bêne avêtin.

SPDK XWE WEKÎ XWEDIYÊ ROJAVA DIBÎNE

Muslim balkişand ser pirsgirêkên navbera PYD û SPDK’ê û got: “Di navbera me û vê partiyê de ferqa zihniyetê heye. Nêzîkatiyên serdest hene. Xwe wekî xwediyê Rojava dibînin. Em jî ligel serdestiya gel in. Em serdestiya partî û kesan naxwazin. Wekî tê zanîn dema SPDK-El Partî dema 74 kes bi awayekî kaçax li başûrê Kurdisanê perwerde kiribû ji sînor derbas dikir ji aliyê hêzên Asayîşê ve hatin binçavkirin. Ger tu ji bo gelê kurd xwe perwerde dikî, wê demê tu çima bi riyên kaçax tê. Ger wisa bikin, mafê lêpirsîn û darizandinê heye. Diyar e li holê niyetek ne baş heye. Ger asayîşê ew negirtina, dê wan sûc bikira."

GIRTINA DERÎ CEZAKIRINA GEL E

Muslim diyar kir ku ji 19’ê gulanê heta niha ji aliyê PDKP’ê ve deriyê Sînor yê Sêmalaka hatiye girtin û got: “Bi vê pêkanînê gelê  Rojava  ceza dikin. Ev pêkanîn bandorek neyînî li ser nexweş, xwendekar û karkeran dike. Li hemberî gelê rojava her roj êrîş pêk tên. Dema PYD’ê gel diparast, ev hêz li ku bûn? Niha dixwazin hêza leşkerî pêş bixin. PYD’ê berxwe da. Li qada şer xwe îspat kir. Got em hêza rewa a gelê kurd in. Û konseya kurd jî ev qebûl kir."

EFRÎN QADEKE STRATEJÎK E

Mulim wiha berdewam kir: “Gelek kesên ku ne diyar in kî ne, xwe wekî Artêşa Azad a Sûriyeyê didin îlankirin.  Hinek komên ji rejîmê veqetiyane û diziya gel dikin jî xwe wekî Artêşa Azad a Sûriyê didin nasîn. Gelekên van girêdayî dewletên derve ne. Yên bi rastî ji bo gelê Suriyeyê têdikoşin jî kêmar in. Hinek dibêjin PYD ligel rejîmê ye. PYD ji roja ewil li dijî rejimê ye. Armanca me ev e ku em di demek nêz de qezencan bi dest bixin. Di demên dawî de pevçûn li Efrînê zêde bûn. Ev qad qadeke stratejîk e. Li aliyekê Şiî hene. Li aliyê din herêma Idlip heye. Dixwazin Efrînê jî bidest bixin. Kurd berxwe didin.”

EM JI BO KONFERANSA NATEWEYÎ BI HÊVÎ NE

Muslim got tevlibûna 13’emîn Lijneya Giştî ya KNK’ê ya li Brukselê pêk hatiye di dema pêş de ji bo konferansa Netewî hêvî dane wan û got: “KNK saziyeke neteweyî ye. Hemû rêxistinên kurdan tevli lijneyê bûn. Nîqaş hemû demokratîk bûn. YNK’ê Mele Baxtiyarî şandibû. Di heman demê de Mesûd Barzanî peyamek şandibû. Vê peyamê kongre rehet kir. Pergala hevserokatiyê hat qebûlkirin. Ev hemû ji bo konferansa li Hewlêrê pêk tên girîng bû."

ANF