AMED 

Hevseroka PYD'ê Asya Ebdullah li ser êrîşa DYA' û mutefîkên din ên li hemberî Sûriyê axivî û got: "Li Rojava tu saziyên rejimê tune ne. Ger êrîş ne li dijî saziyên rejimê, li dijî Rojava pêk bê, wê çaxê emê bifikirin ku êrîş ne li dijî rejimê ye, tiştên din di meseleyê de hene." Ebdullah got ku li Sûriyê tu çareseriyeke ku kurd di nav de nîn bin bi ser nakeve.

Piştî daxuyaniyê li ser pirsa rojnamegeran ku dê beşdarî Kongreya Cenevreyê bibin an na Ebdullah wisa got: "Divê kurd di Kongreya Cenevreyê de hebin. Gere hemû alî beşdarî vê kongreyê bibin.

Hevserak PYD'ê Asya Ebdullah bi vexwendina BDP û KCD'ê ji bo 1'ê Rezberê Roja Aştiyê ya Cîhanê hatibû Amedê û 2 rojan li Amedê bi saziyan re hevdîtin pêk anî. Di dawiyê de Ebdullhah îro li avahiya KCD'ê daxuyaniyeke da çepemeniyê. Di daxuyaniya çapemeniyê de digel heyeta bi Ebdullah re, Hevseroka BDP'ê Gultan Kişinak, Hevseroka KCD'ê Aysel Tugluk û Ahmet Turk, mebûsên BDP'ê Husamettin Zenderlioglu û Halil Aksoy amade bûn.

Vane ji gotinên Ebdullah çend not:

- Di hevdîtinên xwe yên bi saziyan re me qala rewşa Rojava ji bo saziyên sivîl kir û me daxwaza piştgiriyê kir.

- Projeya me ne parçekirina Sûriyeyê, projeyeke ku yekîtiyê ji xwe re wekî bingeh digire. 

- Li Sûriyê ev du sal û nîv e şerek didome, di vî şerî de gelek binpêkirinên mafan çêbûne.

- Li Rojava tu saziyên rejimê tune ne. Ger êrîş ne li dijî saziyên rejimê, li dijî Rojava pêk bê, wê çaxê emê bifikirin ku êrîş ne li dijî rejimê ye, tiştên din di meseleyê de hene.

- Li Sûriyeyê tu çareseriya ku kurd ne di navê de bin bi ser nakeve. Ger kurd ne di nav de bin li Sûriyeyê kes nikare qala aştiyeke demokratîk bike.

- Li Rojava çeteyên çekdar li hemberî kurdan komkujiyan pêk tînin. Ev çeteyên çekdar ji ser Tirkiyeyê re tên û diçin. Ger Tirkiye alîgirê çareseriya demokratîk e divê pêşî li van hatin û çûyînan bigire. Ger ev hatin û çûyîn bisekinin wê çaxê dê hêdî hêdî baweriya kurdan bi Tirkiyeyê çêbibe. Bêdengmayîna li hemberî van komkujiyan, piştgirî dayîna komkujiyan e. Ger êrîş bidomin, kurd dê dest ji têkoşîna xwe bernedin. Hem dê aştî û biratî tê xwestin, li aliyê din dê hebûna kurdan neyê qebûlkirin. Kurd êdî nayên xapandin. Ew dewran derbas bû.

- Kurd her alîgirên çareseriya demokratîk in. Li Rojava li gelek bajaran wekî asûrî, xiristiyan, êzîdî gelek kêmneteweyên bi nasnameyên cuda hene, ew bi hev re dijîn.

- Li Rojava sivîl bi îşkenceyan re rû birû dimînin, rastî komkujiyê tên. YPG ne tenê yê kurdan, parastina hemû gelan dike. Pirsgrêk bi diyalogan tên çareser kirin. Em bi hemû aliyan re hevdîtinan çêdikin. Hevdîtinên me li ser demokrasiyê ne.

- Ger li Sûriyeyê pirsgirêka kurd çareser nebe, li Sûriyeyê demokrasî pêk nayê. Ger demokrasî bê dê ji bo hemû gelen Sûriyeyê be.

- Li Rojava komkujî heye, civak li hemberî vê komkujiyê bêdeng in. Ma ger bi hezaran kes bên kuştin hê dê ji vê yekê re bibêjin komkujî. Bi sivîlan îşkence dikin, serê wan jê dikin. Kurd êdî li mal û gundên xwe nikarin debar bikin. Çete jinan dîl digirin, destên xwe datînin ser milên wan, sê caran dibêjin Ellah û Ekber û dibêjin "êdî ev a min e". Ev yek jî komkujiyek e.