Diyarname

Heyeta jinan ên endamên DOKH'ê li Hewlêrê li bendê ne ku destûr bê dayîn û ew derbasî Rojava bibin.

Di nav heyetê de Hevseroka KCD'ê Aysel Tugluk, Cîgera Hevserokên BDP'ê Yuksel Mutlu, Şaredara Nisêbînê Ayşe Gokkan, Şaredara Licê Fikriye Aytin û Endama Meclisa Daimî ya KCD'ê Nurhayat Altun û çend jinên din ev du roj in li Hewlêrê li benda destûrê ne ku ji Deriyê Sêmalka derbasî Rojava bibin.

Heyet ji bo bîranîna kesên di bûyera bombeteqandina li Hewêlêrê de dê here serdana Wezareta Karên Hundir, paşê dê here serdana kampa penaberên ji Rojava û her wiha kampa Mexmûrê.

Hevseroka KCD'ê Aysel Tugluk ji bo DÎHA'yê axivî, got ku li ser Rojavayê li Tirkiyeyê gelek agahiyên şaş hene, ji bo ew rewşê baş binîn û çavdêriyên xwe werin ji bo raya giştî ya Tirkiyeyê par ve bikin diçin Rojava. Tugluk got ku şoreşa Rojava şoreşa xwe bi rê ve birinê ya xwe bi xwe ye û wisa got: "Ev demek dirêj e em wekî saziyên jinan, hem ji bo piştgiriya bi gelê Rojava re, hem hestên yên wekhev parve bikin, hem jî piştgirî bidin têkoşîna wan me dixwest em herin Rojava."

Tugluk got ku dewleta Tirkiyeyê naxwaze kurd bandorê li hev bikin, ji bo vê yekê derî girtine û wisa got: "Ji bo em derbasî Rojava bibin me seri li Wezareta Karên Derve ya Tirkiyeyê da bi awayekî eşkere ji me gotin ku ew dê destûrê nedin. Wan wekî her gav ewlehî wekî sedem nîşan da lê armanca wan ew e ku pêşî li piştgiridayîna me ya ji bo Rojava bigire."

Aysel Tugluk vekirina deriyê Sînorê Murşîpinar ê ji bo alîkariyên însanî wekî gavek erênî nirşand lê got ku hê jî polîtîkaya Tirkiyeyê ya li Rojava wekî neyartiyê ye.

Hevseroka KCD'ê bal kişand ser Kongreya Neteweyî ya Kurdan û xwest ji bo yekîtî ev kongre li dar bikeve.

Li ser Deriyê Sêmalka jî Tugluk wisa got: "Girtîmayîna deriyê Rojava heta îro bi tu awayî nayê qebûlkirin û ev yek di nav kurdan de bûye sedema nerazîbûnê. Em kurd ne ji ciheke divê li ser rêgezan, bi hêza xwe vê pêvajoyê bimeşînin. Ji vir û wir anîna polîtîkayên xelkê ne lazim e. Divê em dest ji sedemên polîtîkayên ku ji nû ve bibin sedema 'birakujiyê' berdin. Divê hikumeta Başûrê Kurdistanê nebe amûrê hin lîstikan. Gere Hikumeta Başûrê Kurdistanê dest ji van polîtîkayan berde û deriyê Rojavayê veke."