MADRÎD

Partiya Çepgir a Ewropa di navbera 13-15’ê berfanbarê de kongreya xwe li Madrîda Spanyayê li dar xist û di kongreyê de mafê çarenûsa kurdan pejirandin. 

BDP jî beşdarî kongreya Patiya Çepgir a Ewropayê bû. Kongreya ku îro bi encam bû di derbarê wê de nûnerê BDP’ê yê Ewropa Eyyûp Doru ji bo ANF’êaxivî got ku di hevpeymana siyasî de “mafê çarenûsa kurdan hat pejirandin.”

Doru di roja duyemîn a kongreyê de axivî. Wî bal kişand ser pêşketinên li rojavayê Kurdistan û bakurê Kurdistanê. Doru ji pêkhateyên kongreyê xwest ku piştgirî bidin rêveberiya xweser a Rojava û wekî projeya xwe bibînin.

JI 33’Ê WELATAN 300 DELEGE BEŞDAR BÛN

4'emîn Kongreya Partiya Çepgir a Ewropa (ASP) ku ji 33 welatan 300 delege beşdar bûbûn polîtîkayên dema nû pêk anîn. Ji bo serokê partiyê dîsa ji Sekreterê Navneteweyî yê Partiya Komunîst a Fransa (PCF) Pierre Laurent hat hilbijartin. Di Lijneya Serokatiyê de wekî din Serokê Partiya Çepgir Syriza a Yewnanistanê Aleksis Tsipras, ji partiya çepgir a Portekîzê Bloco’ê Marisa Mattias, ji PCE-IU a Îspanya Maite Mola, ji partiya çepgir a Bulgaristanê Margarita Mileva û ji Almanya Die Linkê Diether Dehm jî di nav de cih girt.

TSIPRAS NAMZETÊ SEROKATIYA KOMÎSYONA EWROPA HAT HILBIJARTIN

Pêkhateyên kongreyê ji bo namzetiya Serokatiya Komîsyona Ewropa Serokê Syriza Aleksis Tsipras tercih kir. Patiya Komunîst a Fransa ev tercîh silav kir û bi gotina “Aleksis Tsipras wê bibe dengê berxwedan û hêviyê” hilbijartinên Ewropa yên bihara 2014’ê bi bîr anîn.

Namzetê Komîsyona Ewropa Tsipras di axaftina ku di dawiya kongreyê de kir, got: “Li dijî hovîtî û zêde çepgiriyê alternatîfa yekane çepgiriya Ewropa ye. Dema çepgiriyê hatiye.”