AMED

Danezana encamê ya 1'emîn Konferansa Dîplomasiyê ya Kongreya Civaka Demokratîk (KCD) a li Amedê hat lidarxistin, hat eşkerekirin. KCD'ê xwest, ji bo dîplomasiya kurd li ser bingeha xwe bê rûniştandin Konferansa Neteweyî ya Kurdan bê lidarxistin û biryar hat dayîn ku der barê Rojavayê Kurdistanê de pêngaveke xurt a dîplomatîk were destpêkirin.

Li gorî danezana encamê, konferansa di rojên 1 û 2'yê reşemiya 2014'an de li Amedê kom bû, diyarî Engîn Sîncer û siyasetmedarên jin ên kurd ên li Parîsê hatin qetilkirin Sakîne Cansiz, Fîdan Dogan û Leyla Şaylemez kirin.

Di danezana encamê ya konferansê de hat ragihandin ku bi bexwedana bi heybet a bi pêşengiya Rêberê Gelê Kurd Abdullah Ocalan re têkoşîna azadiyê ya Kurd di çarçoveya Modernîteya Demokratîk de bûye xwedî bingehek karibe Rojhilata Navîn biguherîne.

KCD'ê diyar kir ku divê Têkoşîna Azadiyê ya Kurdstanê ya li Rojhilata Navîn bi pêş dikeve were vegotin û di çarçoveya neteweya demokratîk a gelan de dîplomasî bê meşandin û got, "Derveyî sînor, pîvan û ûslûba dîplomatîk a modernîteya kapîtalîst, afirandina bingeha rêxistinbûyîna dîplomasiyê ya xweser, wekî wezîfeyekê li pêşiya me ye."

Li gorî danezana encamê, pêkhateyên 1'emîn Konferansa Dîplomasiyê ya KCD'ê nîqaşên berfireh li dar xistine, di gelek mijaran de gihîştine heman nêrînê û biryardariyek derketiye holê. 

Çend ji biryarên girîng ên hatine wergirtin ev in:

"Dîplomasiya netewe dewletî li gorî berjewendiyên yekdestiyên navneteweyî tevdigere, dîplomasî ne ji bo aştiyê, ji bo şer rola amadekariyê dilîzin, lewma ne çareserî mirovahî ber bi kaosê ve dibe.

Di şûna vê de divê dîplomasiya neteweya demokratîk a bi pîvanên maf, edalet û exlaqê esas bê girtin, divê ev dîplomasî jî bi kûrbûneke îdeolojîk, biryardariyeke stratejîk û vezelokiyeke taktîkî were meşandin.

Di çarçoveya xebatên dîplomatîk ên navxweyî de divê hemû sazî û rêxistinbûyînên Kurdistanê bi berpirsyariya xwe ya dîrokî rabin, Konferansa Neteweyî ya Kurd tavilê kom bikin û bingehên dîplomasiya kurd diyar bikin.

Pêwîst e girîngiya jiyanî ya Şoreşa Rojava ku di rewşa şerê li Sûriyeyê de bi vîna xwe ya cewherî derket holê û ji niha ve bû hêviyek ji bo gelên Rojhilata Navîn baş were pejirandin û li gorî vê yekê pêngaveke xurt a dîplomatîk were destpêkirin.

Divê azadiya Rêberê Gelê Kurd Abdullah Ocalan ku bi komployeke navneteweyî dîl hat girtin, li navenda hemû xebatên me yên dîplomatîk were bicihkirin.

Ji bo PKK ya ku ji bo azadiya gelan têdikoşe ji lîsteyên 'rêxistinên terorê' bê derxistin, xebatên dîplomatîk bên meşandin.

Ji bo koçberiya bi mîlyonan mirovan a ji ber şerê 30 salan, komkujiyên di dîrokê de li hemberî kurdan hatine kirin û herî dawî jî komkujiya Roboskî bikeve rojeva cîhanhê û rastî derkevin holê, xebatên dîplomatîk ên xwe dispêrin edaletê bên meşandin.

Dema cihê sê jinên kurd ên li Parîsê hatin qetilkirin Sakîne Cansiz, Fîdan Dogan û Leyla Şaylemez ên di dîplomasiya kurd de li ber çavan were girtin diyar dibe ku ev komkujî li dijî têkoşîna rastî û azadiya jinê hatiye kirin û ji bo ronîkirina kiryarên Fransa û Tirkiyeyê û têkiliyên wan ên navneteweyî, xebatên dîplomatîk bên meşandin.

Di serî de li Îranê ku bi darvekirinan zexta li dijî kurdan zêde dibe, li dijî hemû polîtîkayên înkar û tunekirinê helwest were nîşandan û di asta navneteweyî de xebatên dîplomatîk werin meşandin.

Ji bo hemû xebatên dîplomasiyê bi awayekî koordîneyî bên meşandin, divê rêxistinbûyîneke mayînde were afirandin."

Her wiha Konferansa Dîplomasiyê ya KCD'ê  îlana rêveberiya xweseriya demokratîk a Rojava silav kir