Amed

Piştî êrîşa* li Şaredariya Bajarê Mezin a Amedê, Hevserokên Şaredariya Amedê Gultan Kişanak, Firat Anli, Hevseroka BDP'a Amedê Zubeyde Zumrut, şaredarên navçeyan, endamên meclisên şaridariyên û xebatkarên şaredariyê daxuyanî dan çapemeniyê.

Kişanak got ku li ser daxwaza gel wan xizmeta birin û anîna rêwiyan daye dest pê kirin, ev êrîş li ser vê yekê hatiye kirin û wisa dom kir: "Birin û anîna gel a bi giştî mafê gel e. Gera li nav bajêr mafeke bingehîn e. Ev xizmeteke raya giştî ye. Şaredariya Bajarê Mezin a Amedê bi awayekî çalak dê vê xizmetê pêşkêş bike. Mafê gel heye ku di vî warî de xizmeteke baş, xizmeke her gav bikaribe jê sûde bigire, xizmeteke erzan û bi ewle bigire. Şaredariya Bajarê Mezin a Amedê jî di vî warî de peywirdar e ku vê daxwazê bîne cih."

Hevşaredar Kişanak got ku ev êrîş ne li hemberî saziyê li hemberî vîna gel hatiye kirin û wisa dom kir: "Ev êrîş li hemberî gelê me yê ku ji navçeyê dixwaze were bajêr karê xwe bike û vegere hatiye kirin. Ew li gor dilê xwe, bi çi buhayî bixwazî bi vî awayî dixwazin vî karê bikin; ev yek rêxistineke mafyawarî ye. Emê firsendê nedin vê yekê."

Hevşaredara Bajarê Mezin a Amedê Kişanak li hemberî êrîşkara zimanekî tund bikar anî û got: "Her kes bila vê baş bizane, ev der vîna gel temsîl dike. Her êrîşa ku li hemberî vîna gel pêk dê di cih de dê bersivê xwe bigire. Ev sazî ne bê xwedî ye. Xwediyê vê saziyê gel, xebatkarên wê, rêveber û personelên wê ne. Em hemû bi hev re li vir in; ligel partiya xwe, hevserokên xwe, serokê daîreyan, gel, ligel ciwanên xwe em li vir in. Kî bi qasî misqalek êrîşê vê saziyê bike dê bersiva xwe bibînin. Her kes bila vê yekê baş bizane."

Kişanak got ku li bajêr ewê destûrê nedin çenebûn, mafyayî û zordariyê û ev yek lê zêde kir: "Vî bajarî bi çanda xwe ya demokratîk xwe bi dinyayê daye nasîn. Gelê kurd, tevgera azadiya kurd, ev têkoşîn ji bo li vî bajarî gel di nav aştiyê de bijî tê dayîn. Piştî vê êrîşê divê kes neyê navbeynkarî neke. Em 10 caran ji bo hevdîtinê çûn cem wan. 100 carên din jî em dê biçûyana. Em amade bûn ku bi wan re biaxivin, nîqaş bikin, ger hebe pirsgirêkên wan guh bidin wan. Ji bo derfetan deriyê me heta dawî vekirî bû. Lê ji niha û pêde yên ku êrîşê vê saziyê, êrîşê saziya gel kiriye bila li benda diyalogê nebin. Berevajî vê yekê dê bersiva xwe bibînin."

Ji bo ku xebatkarên şaredariyê xwedî li vîna gel derketina Kişanak ew pîroz kirin û wisa got: "Xebatkarên me birîndarî jî da ber çavan û xwedî li saziya gel derketin, pêşî li êrîşkaran girtin. Ji niha û pêde jî dê wisa be. Bila kes nefikire ku em bi fikra êrîşê nêzî vê saziyê bibim. Em dizanin hêzên li pişt wan kî ne. Em dizanin kî ew teşwîq kirine, ew kirine çete, ew bera nav kuçeyan dane. Emê rê nedin wan."

**

- Ajokaran êrîşê Şaredariya Amedê kirin