Gulîzer, Jîla Huseynî, Fatma Savci, Kejal Ahmed û Axîn Welat 5 jinên kurd ên helbestvan in. Û niha di nav rêzepirtûkên ŞAHMARAN a Weşanên Avestayê de derketin pêşberî xwendevanan bi berhemên xwe yên nazik...
Avesta ev demeke dirêj bû, ez texmîn dikim nêzî salekê bû pirtûkeke bi kurdî çap nekiribû û bêdengî lê hakim bû. Û wê rojê bi derxistina qevdek pirtûkan ên bi kurdî ev bêdengiya xwe ji holê rakir.
Di nav vê qevdegula pirtûkan de 5 heb pirtûkên helbestvanên jin ên kurd hebû ki di bin navê rêza ŞAHMARAN de hatine weşandin.
Ez kêfxweş bûm, min xwest bi we re par ve bikim.
***
“Keziyên Jinebî”
“Keziyên Jinebî” navê pirtûka hebestvan Gulîzer e ku ew ji Amedê ye. Gulîzer mamosteya zimanê îngilîzî ye û "Keziyên Jinebî" jî pirtûka wê ya yekem e.
Di pirtûka ku 78 rûpelan de helbestên xweşik hatine pêşkêş kirin.
Yek ji wan:
“Mem”
Ez ji mêj ve bûm Zîn
Xwezî quncikekî dilê te jî
Mem bûya
***
“Gulên Qasid“
“Gulên Qasid” pirtûka yekem a Fatma Savci ye. Savci ku ji Girêmîran a Nisêbîna Mêrdînê ye, 11 salên xwe di girtîgehê de derbas kiriye. Kurdên Bakur ji helbest û nivîsên wê yên ku ji girtîgehê şandibûn û di cihên cur bi cur de hatibûn weşandin nas dike.
û çarînek ji helbesteke Fatma Savci:
Niha ji temenê pirpirîkekê kintir bûye evîn
Dil wergeriyane deşteke bê baran
Soz û peyman geyileke çikiyayîn e mîsal...
***
“Mirina Rojê”
Ez yekem car navê Jîla Huseynî dibihîzim. Ew di sala 1964'an de li bajarê Saqiz a Rojhilat hatiye dinê. Di 15 saliya xwe de dest bi nivîsandina helbestan dike, lê di sala 1996'an de, dema diçe pêşiya helbestvan Şerko Bêkes ku diçû Tehranê di qezayeke trafîkê de jiyana xwe ji dest dide.
Û "Mirina Rojê" yekem pirtûka Jîla Huseynî ye ku li Tirkiyeyê tê çapkirin.
Ji bo pirtûkê Şêrko Bêkes pêşekeke nivîsandiye û ji bo Jîla Huseynî gotiye: "Ji bo azadiya xakê, azadiya jinê, azadiya gotinê dijî, evînî li ku ba ew jî li wir bû (...) Ez bi nêzîk ve, di riya nameyên wê yên ciwan re dizanim ku şiîr aşiq bû û Jîla jî maşûqê wê."
û çarînek ji helbesteke Jîla Huseynî:
Eger bû û te jinek dît
bejna wê bi xemê xemilandî be
çavên wê kiz û xembar bin
û te ez pê şibandim
neveciniqe
nebêje wêneyê vê hejarê
di albuma raburiya min de
yadîgar e.
***
“Bayê Bakur”
Yek ji pirtûkê ku di nav ŞAHMARAN'ê de hatiye çapkirin jî "Bayê Bakur" ê Axîn Welat e. Axîn Welat ku ji Efrînê ye, zêdetir bi pirtûka wê ya "Helbesta bê ziman" (sal 2000) û nivîsên wê yên li ser malperên kurdî hatine weşandin tê nasîn.
Helbesteke Axîn Welat:
Lome
bes loma bike
ditirsim lêvên min
vemirin
***
“Qehweyek ligel wî”
Pirtûka din ku bi navê “Qehweyek ligel wî” ku ji Avesteyê derketiye ê Kejal Ahmed e.
Keval Ahmed ji Kerkûkê ye û heta niha hin berhemên wê çap bûne. “Qehweyek ligel wî” jî ji nav van berheman hatiye bijartin û xwe gihandiye ber destê xwendevanan.
Û helbesteke Kejal Ahmed:
Çay
Tu dizanî
helbestên nexweş
her wek çaya nexweş e
qet mirov nikare bi dawî bîne
.jpg)
.jpg)
.jpg)
