Saziyeke navê wê çi dibe bila bibe xebatkarên wê çiqas demeke dirêj têde bimînin, xebata xwe bidomînin ew sazî ew qasî dibe sazî, ew qas dibe kokqewîm.
Saziyeke çiqas xebatkarên wê zû jê veqetin, her kesên nû bên ser kar ew sazî ew qasî di nav amatorî de digevize, pêlavêtina ji bo profesyonelî ya wê saziyê dereng dimîne.
Saziyên me yên kurdan jî wisa ne.
Ez pêşî vê bibêjim: Min li Azadiya Welat dest bi karê rojnamegerî kir, ez hê jî Azadiya Welat wekî rojnameya xwe dihesibînim loma ez dixwazim li ser mînaka Azadiya Welat biçim.
Tê zanîn, Azadiya Welat li ser şopa Welat û Welatê me karê xwe didomîne ji ber vê yekê emê ji Welat dest bi gerînendeyên rojnameyê bikin.
Heta niha ji Welat, Welatê Me û Azadiya Welat van kesan gerînendetiya weşanê ya rojnameyan kiriye*: Abdullah Keskîn, Mazhar Gunbat, Samî Tan, Zana Farqînî, Sevda Eldemir, Cemil Oguz, Davut Ozalp, Tayyip Temel (Ger em kovara Pîneyê jî parçeyeke vê pêvajoyê bihesibînin divê em navê Mazlum Dogan jî lê zêde bikin)...
Mesele ne ew e ku ev navên ku gerînendetî kirine çima niha naxebitin, mesele ev e: Ev kes herhal hinek zanîna wan hebûye ku bûne gerînendeyê rojnameyê. Wê çaxê ev kes çima niha di Azadiya Welat de nanivîsin?
Her yek herhal quncikekê heq dikin...
Mesela Azadiya Welat here pêşniyazê Abdullah Keskîn bike ku Keskîn ji bo wan qunciknivîskarî bike dê çawa be? Bi ya min Mazhar Gunbat xwedî qelemekî baş e, çima ji bo Azadiya Welat nanivîse?
Yê xelkê wisa dikin: Ji Tirkiyeyê ji we re tenê çend mînak: Yalçin Dogan, Umur Talu, Ahmet Altan, Altan Oymen, Murat Belge, Mehmet Y. Yilmaz û gelekên din... Ji van mînakan A. Altan niha gerînde ye lê yê din ne gerîndeyên rojnameyan in lê her yek di rojnameyekê de qunciknivîskarî dikin. Ji ber ku ew gihîştine, bûne xwedî fikir û ramanên kûr. Ew fikir û raman çima li derve bimînin?
Me ji gerînendeyan dest pê kir, em dikarin li ser nûçegîhanan jî bisekinin. Mînak niha nûçegîhanê herî kevn ê Azadiya Welat gelo çend sal in di rojnameyê de dixebite?
Nûçegîhanên ku niha di Azadiya Welat de dixebitin gelo deh sal hene ku di rojnameyê de ne? Ji xwe nûçegîhanek di çend salan de dikare bibe nûçegîhan ew jî pirseke din e.**
Em bibêjin kesek ku di sala 1995'an de nûçegîhanî dikir niha li ku ye?
Ma nûçegîhanekî nikare 10 salan nûçegîhanî bike? Ger neke û her nûçegîhanên kamilbûyî dev ji kar berdin, her yên nû bên dê çawa be?
Wekî min got ez ji ber ku Azadiya Welat rojnameya xwe dihesibînim min mînaka Azadiya Welat da. Saziyên kurdan ên din ên li Tirkiyeyê jî di heman rewşê de ne. Li ser vê ji we re mînakek: Niha nêzî deh kesên ku di rojnameya Tarafê de îmzeya xwe davêjin bin nûçeyên girîng ji DÎHA û Gundemê çûne.
Wê halê ev saziyên kurd çawa be êdî hûn bifikirin.
Gotina dawî di heman demê de wekî pêşniyar: Gere Azadiya Welat xwedî li gerînende jî, xwedî li nûçegîhanên xwe jî derê.
Her wiha saziyên din jî...
*Ger navên gerînendeyên 'Welat'an ên ku min ji bîr kiribin hebin xêra xwe bila min haydar bikin ku ez navên wan lê zêde bikim.
** Yên ku dixwazin dikarin li pirtûka "Rojnamegerî û pîvanên wê yên sere", Cemil Oguz, Weşanên Pêrî binêrin)
.jpg)
