Gotina pêşî: Ez vê nivîsê wekî hilbijêrekî, wekî kurdek ji rêzê dinivîsim, ne bi nasnameyê xwe yê rojnamegerî.
Ev sernavê ku min lê kiriye ji aliyê min ve neyê nîqaşkirin, teqez e. Ez dubare bikim: HDP ger bi berendamên serbixwe bikeve hilbijartinê ez dê dengê xwe nedim wê. Ger wekî partî bikeve hilbijartinê ku divê wisa bikeve, ez dê hem dengê xwe bidim, hem ji bo wê çi ji destê min bê ez dê bikim.
Em bên ser sedemê:
Partiyek ji bo çi heye? Ji bo ku bikaribe bibe dengê hilbijêrên xwe.
Partiyek ji bo çi heye? Ji bo ku bibe desthilatdar, yan jî bi qasî desthilatdar bi bandor.
Bi berendamên serbixwe HDP nikare bibe ev her du jî.
Heta niha biryara ketina hilbijartinê bi berendamên serbixwe di cih de bû. Lê êdî dem hatiye ku êdî wekî partî beşdarî hilbijartina giştî ya li Tirkiyeyê bibe. Di Hilbijartina Serokomariyê de li hemû bajarên kurdan û Tirkiyeyê bi temamî xebat nehatibe kirin jî ji hemû bajaran deng girt bi berendam û hevserokê xwe Selahattin Demirtaş. Heman Demîrtaş niha dîsa Hevserok e û rêberê HDP ye ku HDP bi wî dê bikeve hilbijartinê. Tiştê cuda ev e ku vê carê dê bikaribe li 81 bajaran berendaman nîşan bide û ji hilbijêrên 81 bajaran dengan bigire. Ji bo bajarê kurdan hedef ew e ku dengên ku girtine zêdetir bikin. Lê zêdetir jî bar dikeve ser hilbijêrên li bajarên Tirkiyeyê, bi taybetî jî bajarên mezin, yanê metropolan.
Vane hin îstatîstîkên ji Hilbijartina Serokomariyê;
Mînak Stenbol.
Li Stenbolê Demîrtaşî sedî 9,09 bi giştî 650 hezar û 670 deng girtin.
Li Îzmîrê sedî 7,98, bi giştî 188 û 99 deng
Li Enqereyê, sedî 3,47, bi giştî 95 hezar û 31 deng.
Mêrsîn, sedî 13,46, bi giştî 122 hezar û 561 deng
Edene, sedî 10,66, bi giştî 114 hezar û 530 deng.
Wisa didome. Ev bajar û bajarên din... Gere her derê dengan bilind bike. Li Stenbolê 9 mîlyon û 387 hezar û 327 hilbijêr hene. Dema li Stenbolê ev 650 hezar î derxe mîlyonek an bi ser mîlyonek wê çaxê rêya têkbirina bendava sedî 10 vedibe. Ev yek ne tiştek gelek zehmet e.
Ji bo vê xebat, xebat û xebat divê. Helbet berendamên baş.
Dema di vê hilbijartinê de bendav têk here careke din dikare ji bo desthilatî qub bixwaze. Lê ger dîsa bi berendamên serbixwe beşdar bibe ne bendav têk diçe, ne desthilatdarî tê...
Ma partiyek her car bi berendamên serbixwe bikeve hilbijartinê dê çawa ji hilbijartinên xwe re bibêje ez hêviya we me? Li ser vê mirov dikare gelek tiştî bibêje. Lê gotina kurt xweştir e.
Welhasil, min gotina xwe got: HDP ger dixwaze dengê min bigire divê wekî partî beşdar bibe. Nexwe, bila rêya wê vekirî be, lê ezê dengê xwe ne bidim wan serbixweyan ne jî partiyek din.
.jpg)
.jpg)
.jpg)
.jpg)
