Hêzê dewlete bi talîmatê Serdozgerê Komara Mêrdînî seba “Hîleyê Îhaleyan ” 18’ê na aşme de eştê Unîversîteya Artuklî ya Mêrdînî ser. Nê operasîyonî de dormeleyê hewtay kesî tepiştî.
Çîyêko ma eleqe keno û çîyêko ma pê dejenê mîyanê nê tepiştoxan de bîyayîşê Prof.Dr. Kadrî Yildirimî yo!
Ma zanê ke û kesê ke Kadrî Yildirimî şinasnenê baş zanê ke eleqeyê birêz Kadrî Yildirimî bi çîyê winasîyan nêbeno. Û kesê ke Kadrî Yildirimî şinasnenê zanê ke Kadrî Yildirim merdimêko durust o. Tenezulê malê dinya nêkeno. Merdimêko bawermend o. Xora qet nêzdî malê heramî nêbeno. Ma biecebnê-nêecebnê Kadrî Yildirim merdimêko dindar o. Derheqê peran de û îhaleyan de seba menfîetê xo tu car bêusulî nêkeno.
Labelê ewro ey zî kerdê mîyanê nê gureyê lêşinî û ey zî tepiştê! Gelo çira Kadrî Yildirimî zî kerdê mîyanê nê kategorîyî?
Prof. Dr. Kadrî Yildirim Unîversîteya Artuklî de Serekê Enstîtuya Ziwanê ke Ciwîyenî yo û Hetkarê Rektorê na Unîversîte yo.
Na unîversîte de tarîxê 10.12.2009’in de bi qerarê Heyetê Wezaretan no enstîtu abi. Badê ke no enstîtu abi kar û xebata kurdkî zî destpêkerd. Ewro bi saya na unîversîte edebîyat, kultur û ziwanê kurdkî roje bir oje aver şino.
Na unîversîte bê nê xebatan mamostayanê dersa kurdkî zî perwerde kena. Ewro zaf mekteban de tay bê zî nê mamostayî dersa kurdkî danê.
Xora ziwanê kirmanckî xeyrê na unîversîte de ha yew sewîya zaf berzî de. Nê çend serrîyê ke abîyayîşê na unîversîte ra nata hem hûmara mamostayan de hem xebata ziwan, kultur û edebîyatê kurdan de (kurmanckî, kirmanckî) kurdî ameyê sewîyayêka erjîyaye. Hem hetê kalîteyî ra hem zî hetê hûmare ra ma kurdî qedr û qîmetê na universîte baş zanê.
Nê xebatê kurdkî pêro zî bi plan û programê Kadrî Yildirimî benê. Yanî nê xebatî binê berpirsîyarîya Kadrî Yildirimî ra ravêrenê.
Şaro kurd, şaro tirk û şarê Ewropa zî Kadrî Yildirimî baş şinasnenê. Xora dewlete ma hemine rê zafêr zana, û ma hemine rê zafêr Kadrî Yildirimî şinasnena.
Kadrî Yildirim seba kurdkî bê na xebata unîversîte sewbîna zî xebate keno. Kurdkî ser zaf kitabê ey estî. Beşdarê zaf panel û konferansan beno û nê panel û konerasan de fikrê xo yê kurdan ser o bicesaret vano.
Dewlete nê taybetmendîyê ey tehmul nêkena. Ewro çend unîversîteyê bînî zî warê kurdkî de xebate kenê. La cayê xebata Unîversîteya Artuklu sewbîna cay o.
Ma gore binê nê operasîyonî de “Hîleyê Îhaleyan” ney, kar û xebata kurdkî esta. Kadrî Yildirim zî seba ke warê xebata kurdkî de çalek o û aktîf o ameyo tepiştiş.
Ez tepiştişê Kadrî Yildirimî protesto kena.
Sere de Kadrî Yildirim dima zî ê kesê ke na unîversîte de wayîrê ilmî yê û xebata ilmî kenê nê operasîyonî de tepîşîyê ganî derhal bêrê veradayîş û azad bibê.
.jpg)
.jpg)
.jpg)
