RIHA

Serokwezîrê Kantona Kobanî Enwer Muslim û heyeta pêre ji bo hevdîtinan bike hat Pirsusê. Heyetê ji bo çareserkirina hatin û çûyînên di deriyê sînor re, ji bo alîkariya mirovî bi rayedarên dewleta Tirkiyeyê re hevdîtin pêk anî. Muslim diyar kir ku hevdîtina wan bi awayekî erênî derbas bûye û ew bawer dike ku di pêşerojê de dê encamên vê hevdîtinê bibînin.

Di nav heyeta ku hat de Serokwezîrê Kantona Kobanî Enwer Muslim, Serokê Desteya Karên Civakî Mehmûd Bişrî û Serokwezîrê Tenduristiyê Dr. Nahsan Ahmed hebûn. Heyetê pêşî ligel rayedarên dewletê hevdîtina ku şopandina wê ji bo çapemenî girtî bû çêkir. Dûre Hevşaredara Pirsûsê Zuhal Ekmez, Parlamenterên HDP'ê Îbrahîm Ayhan û Aysel Tûglûk û Hevserokê DBP'ê ya Pirsûsê Îsmaîl Şahîn pêşwazî li heyetê kir. Di şaredariyê de hevdîtinek hat lidarxistin. Di hevdîtinê de Enwer Muslim bi kurtasî axivî û diyar kir ku ji bo pirsgirêkê derketine holê bi rayedarên Dewleta Tirkiyeyê nîqaş bikin ew hatine Pirsûsê.

Muslim da zanîn ku bi rayedarên Tirkiyeyê hevdîtin pêk anîne, hevdîtina wan bi erênî derbas bûye û wiha axivî: "Pêdiviyên me ji hêla civakî, ji xwarin, ji vexwarin, derman, nan û ji hêla tenduristiyê ve kêmasî hene. Ji bo rêya van bên vekirin, çûyin û hatin serbest bibe divê rayedarên Tirkiyeyê hewl bidin û alîkariyê bidin Kobanî. Ji bo dan û standina me bigihîje astek jor em hatin me bi wan re hevdîtin pêk anî. Hevdîtina me erênî derbas bû. Di rojên pêş de ez bawerim wê encam bên girtin û van sozên xwe bigrin."

Muslim bal kişand ser berxwedana şervanên YPG/YPJ'ê û got ku berxwedana Kobanî ya bêhempa meha 4'emîn li paş xwe hişt û ket meha 5'emîn û wiha domand: "Şervanên me her diçe Kobanî rizgar dikin. Li Kobanî 9 tax di destê me de ne, 4 taxên me jî di destên çeteyan de ne. Lê divê alîkariya çekan jî bên kirin. Bi hezaran welatiyên me yên sivîl jî di xeterê de ne. Balafir tenê ne bes in. Divê çekên li ser erdê herî zêde bin. DAIŞ hê ji bo komkujiyê hewl dide. Em soz didin ku em ê li ser Kantona Kobanî biratî û aştiyê pêk bînin û rizgariya Kobanî nêz e. Em ê Kobaniya xwe bi tevî gundên xwe rizgar bikin."