NAVENDA NÛÇEYAN 

Navenda Çapemeniya YPG’ê diyar kir ku hêzên wan ên Kobanî û Cizîrê ji 2 aliyan ve li hemberî çeteyên DAIŞ’ê yên li Girê Spî (Til Ebyad) operasyona dorpêçkirinê daye destpêkirin û heta niha bajaroka Suluk, 31 gund û 20 gundik rizgar kirin.

Di daxuyaniya YPG'ê de wisa hate gotin: “Di çarçoveya Hemleya Fermandar Rûbar Qamişlo ya ku ketiye roja xwe ya 39’an de, hêzên me yên giredayî Kantonên Kobanî û Cizîrê, li hemberî çeteyên li Til Ebyad (Girê Spî) û derdora vê bi cih bûne tevgerek dorpêçkirinê dane destpêkirin. Hêzên me yên ku şeva din bajaroka Suluk azad kirin xebatên xwe yên lêgerînê berdewam dikin. Hêzên me piştî Suluk rizgar kirin, berê xwe dan qada di navbera Til Ebyad û Suluk de û li vê herêmê gundên bi navê Seîdo, Xişman, Til Eşq Seîde, Bêjing, Kevok, Enzê, Mişêrfa Şêx, Îsawî, Ayn Ul Arus û 20 mezrayên din ji çeteyan paqij kirin."

Daxuyanî dibêje hêzên wan bi berxwadaniya Kobanî ya dîrokî destan nivîsandin, ji rojava û başûr rojavayê Til Ebyadê pêşve çûne û derbeyên giran li çeteyan xistine. Daxuyani wisa didome: "Hêzên me yên Kobanî jî di nava 24 saetên dawî de li vê herêmê gundên bi navê Frêhan, Hêmira Kurda, Hemira Ereba, Boxa ya Mezin, Boxa ya Biçuk, Rafî, Sikêrat, Im Hiwêş, Nihit, Ebu Zihur, Bedrîa, Ebu Xireze, Xirbet Ebid, Xirbê Elwe, Curîl Xet, Gundê, Cihişa, Seddê, Faris, Eribet Ecil a Mezin, Eribet Ecil a Biçuk û  Mebdece ji çeteyan paqij kirin. Hêzên me gihîştin milê rojhilatê bajara Til Ebyad û li vir di navbera hêzên me û komên çeteyan de a niha şerên dijwar diqewimin. Dîsa hêzên me yên ku ji bo giredana çeteyên li Til Ebyadê bi Reqa re qut bikin ketine nava tevgerê û 4 km nêzî rêya Til Ebyad-Reqayê bûne."

Daxuyanî dibêje heta niha hevalekî wan pêl li mayînê kiriye û wefat kiriye. HPG'ê di daxuyaniya xwe de dibêje hin derdor û dezgehên çapemeniyê agahiyên derew û dûrî rastiyê yê wekî, di tevgera me de mirovên medenî zirar dibîne belav dikin û wiha got: "Hêzên me ji ber ku baş dizane çeteyên DAIŞ’ê hemwelatiyan wekî mertalên zindî bikar tîne, bi hîşyariyekî awarte tevdigerin. Heta niha di hemleya me de tiliya yek hemwelatiyekî jî xwîn nebûye.”

Gelê Girê Spî derbasî Bakur bû

Di vê navberê de gelê li Girê Spî ku çeteyên DAIŞ'ê dixwestin wan wekî mertalên zindî bikar bînin, ji dest çeteyan reviyan û berê xwe dan sînor. Gel zor li têlan kirin û derbasî Bakur bûn. Li ser vê yekê Tirkiye mecbûr ma derî veke û wan bigire vî alî.