Amed
Li gundê Girê Izêr a Bismila Amedê neftek 34 gravite hate dîtin. Ev 4 meh bûn li vê derê lêkolîn dihat kirin.

Şîrketa Aladdin Midle East îngilîz li gundê Girê Izêr ev 4 meh in ji bo neftê kolandinê pêk tîne. Di encama çar mehan de li bîrî Arpatepe 1, di kûrahiya 2 hezar û 400 metroyî de neft hate dîtin. Hate gotin ku neft di eyarê 34 gravîtî de ye.
Moxtarê gund Abdulkadir Azizoglu da zanîn ku bi dîtina neftê re li bendê ne ku qedera gund biguhere.

Ji gundiyan Hilmi Guzel jî da zanîn ku di warê binesazî, rê, av, tenduristî û perwerdehiyê de gelek pirsgirêkên gund hene û wiha dom kir: "Gelek kêfa me hat ku li vê derê nefteke biqelîte hate dîtin lê pirsgirêkên me jî li holê ne. Şîrketa biyanî qadeke 14 donimî ji bo salekê bi 15 hezar YTL'yî kirê kir. Bi derketina neftê re em li bendê ne ku erdê me binirxtir bibe."

Midûrê Herêmê yê Batmanê yê TPAO'yê diyar kir ku li Qozlixa Batmanê li sehaya Şelmo nefteke bi 32 gravîtî derketibû, neftê ku di bîra Arpatepe 1 de hatiye dîtin 34 gravît e û ev yek neftê herî bi qelîte yê ku heta niha li Tirkiyeyê hatiye dîtin e.

Gundê Girê Izêr 80 kîlometre dûrê Amedê ye û ji Bismilê jî 25 kîlometre dûr e. Li hejmartina sala 2000'î serjimariya gund 633 ye. Gund bi çandinî û sewalvanî debara xwe dike.