AMED 

Li Amedê du saziyên ziman Platforma Zimanê Kurdî û Tora Ziman û Çanda Kurdî komîsyoneke bi navê "Komîsyona 21'ê Reşemiyê/Sibatê" ava kir. Komîsyon ji 5 kesan pêk tê. Ev komîsyon 21'ê vê mehê ku Roja Zimanê Zikmakî yedê kampanyaya ziman bide dest pê kirin. Lê ji ber ku wê rojê qedexeya derketina derve heye, 22'yê mehê dê bi awayekî fermî bidin dest pê kirin. Diruşmên kampanyayê “Bila zimanê kurdî bibe zimanê fermî” û “Bila zimanê kurdî bibe zimanê perwerdehiyê” ne.

Komîsyonê bang li hemû kurdan dike ku piştgiriyê bidin vê kampanyayê.

Li ser navê komîsyonê îro li Cemiyeta Rojnamegeran a Amedê civîna çapemeniyê hat li dar xist. Endam û rêveberên Platforma Zimanê Kurdî û Tora Ziman û Çanda Kurdî beşdarî civînê bûn. Daxuyaniya kapmanyayê bi zaravayên kurmancî û kirmanckî (zazakî) û tirkî hat amadekirin û Berdevkê Platforma Zimanê Kurdî Şerefxan Cizîrî daxuyanî xwend.

VAYE EW DAXUYANÎ:

“Zimanê me hebûna me ye, zimanê me nasnameya me ye, zimanê me rûmeta me ye… Lê mixabin ev nêzî sed salî ye, siyaseta serdest bi darê zorê dixwazin kurdan ji vî mafê wan ê rewa bêpar bihêlin. Bi gotineke din dixwazin kurd ji hebûna xwe dûr bikevin, bê nasname û rûmet bimînin.  

DIVÊ ZIMANÊ KURDÎ BIBE ZIMANÊ PERWERDEHIYÊ

Îro bi mîlyonan kurd li Rojhilata Navîn pêrgî asîmîlasyonê dibin. Di erdnîgarîya me de siyaseta serdest dixwaze kurdan û zimanê wan ji holê rake. Ew siyaseta çewt dixwaze kurdan ji aliyê ziman û çandê ve tune bike, lê ev helwest tu caran nabe helwesteke demokratîk û mirovî. Ev helwest li dijî fikir û ramanên wekheviyê ye jî. Divê ev siyaseta çewt demildest were terk kirin û mafê kurdan yê ziman û nasnameyê were pejirandin. Zimanê kurdî divê bi haweyekî fermî bibe xwediyê statûyeke qanûnî, Zimanê kurdî divê bibe zimanê perwerdehiyê.

KAMPANYA BI DU LINGAN DÊ WERE BIRÊVEBIRIN 

Em bi pêşengiya Platforma Zimanê Kurdî û Tora Ziman û Çanda Kurdî kampanyaya îmzayê ya ‘Bila zimanê kurdî bibe zimanê fermî’ û ‘Bila zimanê kurdî bibe zimanê perwerdehiyê’ didin destpêkirin. Kampanya wê di 22’yê mehê (reşemiyê) de dest pê bike û kampanya wê li ser du lingan bimeşe. Lingek jê îmzayên fizîkî yên ku li kuçe û kolanan xwe bigihejînê kurdan. Lingê din jî îmzaya dîjîtal e. Ev ji bo kurdên ku derfeta wan a ku xwe bigihînin forma îmzayên rû bi rû tune ye amade bûye. Ji bo kesên ku ne kurd bin û hîna nirxên mirovahiyê bi tevahî winda nekirine û dixwazin dawî li vê şerma sedsalê bînin, ev ling hatiye amadekirin.

LI DORA KAMPANYAYÊ BICIVIN 

Ev kampanya çiqasî bi navê Platforma Zimanê Kurdî û Tora Ziman û Çanda Kurdî were destpêkirin jî, kampanya di bingehê xwe de ya hemû kurdan e. Rêxistin, partî û dîtinên me yê sekna jiyanê çi dibe bila bibe, zimanê me hevpar e, ev kampanya ji bo ziman e, encamê wê ji bo hemû kurdan e. Ji ber vê sedemê em bang li hemû sazî, dezgeh, rîspî, rewşenbîr û kurdên cihanê dikin, ev beriya her tiştî kampanya we ye, ji bo zimanê we ye. Li dora vê kampanyayê bicivin, ev hêviya sed salan e ku kurd li bendê ne, em bi mafê zimên tacîdar bikin.

BANGA JI BO HEMÛ KURDAN

Em bang li hemû kurdan dikin: Bi hev re xwedî li van daxwazan derkevin û bi dilgermî beşdarî vê kampanyayê bibin. Em bi vê kampanyayê dixwazin bi mîlyonan îmzeyan berhev bikin. Ji bo kampanyaya me her îmzeyek nirxek e, helwestek e, dengek e û xwediyê giranîyekê ye. Di vê kampanyayê de îmzeyên me çiqas zêde bin, li hember xêrnexwazan wê vîn û xwesteka gelê kurd ew qas mezin bibe. Li hemû deverên cihanê jî wê dengê me hê xurtir bibe.

Ji ber van sedeman, em bi îmzayên xwe qêrînekê li cihanê belav bikin. Bila hemû cihan bizane ku kurd bi yek dengî dibêjin:

Bila zimanê kurdî bibe zimanê fermî.

Bila zimanê kurdî bibe zimanê perwerdehiyê."

MA - Diyarname