Qamişlo
Li Parka Xwendinê ya Qamişloyê çalakiya îmzekirina pirtûka "Serpêhatiyên Jineke Kurd" a Fewziye Hecî Birko hat lidarxistin. Birko di pirtûka xwe de behsa zilma rejîma Esad a li dijî malbata wê û zehmetiyên jina kurd kir.
Malbata Fewziye Hecî Birko bi hevkariya Yekîtiya Rewşenbîrên Kantona Cizîrê şahiya îmzekirina pirtûka "Serpêhatiyên Jineke Kurd" a Fewziye Hecî Birko organîze kir. Di çalakiyê de hejmarek siyasetmedar, nivîskar, rewşenbîr, helbestvan û dostên malbatê amade bûn.
Fewziye Hecî Birko di 1952ˊyan de li bajarê Amûdê ji dayik bûye, dayika 8 zarokan e, dayika Endamê Desteya Serokatiya Partiya Yekitiya Demokratîk (PYD) Aldar Xelîl e. Wê tenê refa yekê xwendiye, hezkirina nivîsandinê ji dê û bavê xwe wergirtiye ku jê re çîrokên jiyana xwe qeyd dikirin. Ruxmî ku fêrî nivîsandinê nebûye, lê bi rêya xwendina Quranê piçekî fêrî xwendina zimanê erebî bûye. Di nivîsandina vê pirtûkê de mamosteya zimanê kurdî yê Zanîngeha Rojava Ciwan Omer pê re bûye alîkar.
Di çalakiyê de mamoste Ciwan Omer bixêrhatina haziran kir û diyar kir ku wî nivîsandina pirtûka xwe hişt û ji bo vê pirtûkê dema xwe vala kir. Omer anî ziman ku ruxmî mamostetiya wî ya ji 2011ˊan ve lê bi rêya Fewziye peyvên nû yên kurdî fêr bûye.
Omer anî ziman ku wî li mala wê li çîroka wê guhdar dikir, hin caran dinivîsand û hin caran deng qeyd dikir ku piştî nivîsê jê derxe. Nivîsandina pirtûkê nêzî 8 mehan dom kir.
Fewaziye Hecî Birko jî got ku wê texmîn nekir ku pirtûk bigihîne vê astê û bi vî awayî berfireh bibe. Birko diyar kir ku wî êş û zehmetiyên jina kurd û zilma rejîma berê li dijî malbata wê xistine pirtûkê. Mêrê Fewziye Hecî Birko di girtîgehê de bû, kurê wê li çiyê bû û malbata wê di şert û mercên zehmet re derbas bûn.
Di çalatiyê de spasiya ji her kesê hat kirin ku xebat li ser vê pirtûkê kirine. Dûre helbestvan Ferhad Merdê helbestek diyarî wê kir û bi îmzekirina pirtûk û diyarîkirina haziran re çalakî bi dawî bû.
