Diyarname

Nivîskara ji Zelandaya Nû Eleanor Catton xelata bi qîmet a wêjeyê Man Booker girt ku bi vê yekê bû nivîskara herî ciwan ku vê xelatê digire.

Li Îngilistanê bi navê Xelata Man Booker xelateke girîng a wêjeyê her sal didin nivîskaran. Îsal nivîskara 28 salî Eleanor Catton bû xwediya vê xelatê.

Catton bi pirtûka xwe "The Luminaries" ev xelat bi dest xist, di heman demê de di dîroka vê xelatê de romana herî qalind nivîsandiye. Romana Catton 832 rûpel û mijara wê di sedsala 19'an de li ser çîroka repenî ya madenkarên zêran e.

Xelata Man Booker ev 45 sal in tê dayîn û xelata wê ya pereyan jî 50 hezar paund e.

Di sala 1991'ê de Ben Okri bi romana xwe "The Famished Road" xelat girtibû û wê çaxê ew bûbû nivîskarê herî ciwan ku vê xelatê digire, ku wê çaxê 32 salî bû. Niha Catton ev rekora wî şikand.

Dîsa di warê romana herî qalind de jî Hillary Mantel bi romana xwe "Wolf Hall" ku 672 rûpel bû ev xelat girtibû, Cattonê bi romana xwe ya 832 rûpelî ev rekor ji destê wê jî girt.