DiyarName.Com

Hevserokê Giştî yê BDP'ê Selahattîn Demîrtaş, namzetên xwe yên şaredariyên herêma Serhedê îro bi civîneke eşkere kirin.

Diyarname

Hevserokê Giştî yê BDP'ê Selahattîn Demîrtaş, namzetên xwe yên şaredariyên herêma Serhedê îro bi civîneke eşkere kirin. Demîrtaş got: "Li Tirkiyê êdî hêzeke sêyemîn a alternatîf heye. Li dijî artêşa Îmam, li dijî leşkerên Mustafa Kemal û li dijî dizên Tayyîp, em hêzek in."

BDP'ê namzetên xwe yên şaredariyên herêma Serhedê bi merasîmek bi beşdariya Hevserokê BDP'ê Selahattîn Demîrtaş, Cîgira Serokê Koma BDP'ê û Parlamentera Îdirê Pervîn Bûldan, parlamenter û rêveberên BDP'ê eşkere kir.

Civîn li Salona Dawetê ya Dîren a li Wanê pêk hat û beşa yekemîn li çapemeniyê girtî pêk hat. Di beşa duyemîn a civînê de namzetên şaredariyan hatin eşkerekirin.

Hevserokê BDP'ê Selahattîn Demîrtaş li vir axivî û diyar kir ku di çarçoveya xebatên hilbijartinê yên bi dirûşma "Bi rêveberiya cewherî re ber bi nasnameya azad" de, ew ji bo aşkerakirina namzetên herêma Serhedê hatine cem hev.

Demîrtaş bibîr xist ku ji hilbijartinên herêmî yên 2009'an û vir ve temamiya şaredariyên wan rastî operasyona siyasî hatine û anî ziman ku di dema pevçûna navbera dewlet û hikumetê de, dewlet û AKP'ê di sala 2009'an de hevkarî kirine, ji bo tunekirina BDP'ê bûne yek û 10 hezar siyasetmedarên kurd girtine.

Demîrtaş diyar kir ku tu ji hevalên wan bi diziyê nehatine sûcdarkirin û got, "Hemû saziyên me ser û bin kirin, lê di encama lêgerîna xwe de ji pirtûkan wêdetir tiştek nedîtin. Li mala tu hevalên me ne qase ne jî qutiyên pêlavan ên tê de dolar hebûn, derneketin."

‘SÎSTEMA HEVSEROKATIYÊ WÊ FERMÎ BIBE’

Demîrtaş da xuyakirin ku şaredariyên BDP'yî bi zelalî û dirustiya xwe her tim li pêşiya gel e û got, "Em ne tenê li çend şaredariyan, li hemû şaredariyan derbasî sîstema hevserokatiyê bûn. Emê hevserokên xwe yên diyar bûne ji îro û pê ve eşkere bikin. Li cihên diyar nebûne jî emê piştre eşkere bikin. Li Tirkiyê rêveberên jin, parlamenter û şaredarên jin ji bo partiyên din wekî reng tên dîtin, lê ji bo me hêmana eslî ne. Emê bi têkoşîna xwe re, bi sîstema xwe ya hevserokatiyê ya li şaredariyan re, vê fermî bikin."

Demîrtaş diyar kir ku hilbijartinên herêmî yên 30'ê Adara 2014'an ji bo partiyên din ji ber rantê girîng e, lê ji bo wan xwedî girîngiyeke dîrokî ye û got, "Li aliyekî mejiyekî baweriya gel diziye û ji bo xwe xerc kiriye û hêzên navneteweyî, li aliyê din jî partiyên bi hev re di nava tifaqekê de olê bikar tînin û hewl didin hebûna xwe ya li Tirkiyê dewam bikin. Lê êdî li hemberî van li Tirkiyê hêzeke sêyemîn a alternatîf heye. Li dijî artêşa Îmam, li dijî leşkerên Mustafa Kemal û li dijî dizên Tayyîp, hêzeke nû heye. Tevahiya Tirkiye dê ji bo vê şahidiyê bike. Hemû xebatkarên BDP'ê xwedî yekwicûd in û bi hev re ne."

Demîrtaş di axaftina xwe de ji şaredarên wezîfeya xwe temam kirin spas kir û bi sînevîzyona hat amadekirin re namzetên şaredariyan eşkere kir.

Vaye hemû lîsteya berendamên şaredariyê yên herêma Serhedê:

AGIRÎ

Agirî navend: Sirri Sakik

Diyadîn: Hazal Aras

Bazîd: Mûrat Rohat Ozbay

Zêdkan: Nesîm Sabûncû

Xamûr: Seydîn Aslan

Patnos: Fecrî Aslankan

Dûtax: Firat Ozturk

ERDEXAN

Erdexan: Yavûz Ûsanmaz