Diyarname
21'ê Reşemiyê Roja Zimanê Zikmakî ya Cîhanê ye. Îro roja zimakê kurdî ye û em bi vî awayî xwedî lê dertên.

Bele li dinyayê li dor 6 hezar zimanî heye. Ji van zimanan hin jê her winda dibin. Li gor UNESCO'yê ji zimanên heyî 200 hebên din jî li ber windabûnê ne.

UNESCO'yê hefteya borî li Parîsê daxuyaniyeke da. Li gor nûçeya Celil Demiralp (ANF) UNESCO'yê ragihandiye ku li Tirkiyeyê 18 ziman li ber windabûnê ne. Û UNESCO'yê zaravaya kurdî zazakî jî xistiye nava ev zimanên ku li Tirkiyeyê winda dibin.
Ev bi xwe jî di vê Roja Ziman de meseleyeke girîng e. Li Tirkiyeyê kurdî digel di televîzyona dewletê TRT 6 de tê bikaranîn jî hê bi awayekî fermî nehatiye pejirandin.
Hê di dibistanan de kurdî wekî ders nayê dayîn. Rewşa fermî ya li Tirkiyeyê ev e. Lê rewşa saziyên kurd hinek din cihê ye ji ber ku ew bi çalakî, mîtîng û hewldanên xwe yên din xwedî li kurdî derdikevin.
Enstîtuyên kurdî (ya li Stenbol û ya li Amedê), TZPKurdî, Kurdî-Der û wekî din jî saziyên din ên kurdan ji bo kurdî bi awayekî fermî bê qebûlkirin, dîsa ji bo ku kurdî geş bibe di nav tevgerê de ne. Li gor gotina Samî Tan niha li Tirkiyeyê (bajarên kurdan jî têde) li dor hezar û 500 xwendekarên ku di qursên TZPKurdî de dersê dibînin hene. Tenê li Stenbolê niha li 23 cihan qurs tê dayîn.

21'ê Reşemiyê Roja Zimanê Zikmakî ya Navneteweyî ye ku ji sala 2000'î ve tê pîrozkirin, kurd jî bi çalakiyan pîroz dikin. Daxwaza me wekî Diyarname jî ev e ku hem kurd ji her alî ve xwedî li zimanê xwe derên, hem jî dewlet zimanê kurdî bi awayekî fermî qebûl bike; di dibistanan de wekî ders bide xwend.
Bi hêviya ku dê zimanê me her bi pêş ve biçe Roja Zimanê Zikmakî ya Navneteweyî pîroz be.

***

Têbiniyeke: Berî niha ev xêz di rojnameya Ozgur Polîtîka û kovara Zendê de jî hate weşandin. Bikaranîna xêzê di weşaneke din de qedexe ye. Kesên ku bixwazin vê xêzê bikar bînin divê bi awayekî fermî ji xwediyê xêzê Dogan Guzel destûrê bistînin.