Diyarname
Hewldana çûyîna Rojava a rêveber û endamên Komeleya Nivîskarên Kurd bi qedexeya dewleta Tirkiyeyê bi dawî bû.
Rêveber û endamên Komeleya Nivîskarên Kurd ji bo şikandina ambarboya ser Rojava, ji bo piştgiriya gelê Rojava roja 27'ê mehê ji Amedê ketin rê û ji bo herin Rojava ber bi Deriyê Dirbêsiyê ve çûn.
Li ber derî ew dan sekinandin û li benda destûra ku dê ji Wezareta Karên Hundir a Tirkiyeyê bihata man. Ji aliyê BDP'e ve mebûsên BDP'ê Îdrîs Baluken û Adil Zozanî bi wezaratê re ketin nav têkiliyê ku destûrê bigirin. Nivîskaran wê şevê, şeva xwe li ber derî derbas kirin bêyî ku herin malan, yan cihek bimînin. Heta roja 28'ê mehê dor nîvrokî nivîskarên kurd li ber deriyê Dirbêsiyê man. Li dor nîvrokî Wezareta Karên Hundir ji BDP'yiyan re û ji nivîskaran gotin ku destûr derketiye dikarin derbasî Rojava bibin lê ne ji deriyê Dirbesiyê re, bila ji Deriyê Nisêbînê re derbas bibin. Ji bo vê yekê nivîskar siwarê erebeyên xwe bûn û berê xwe dan deriyê sînor ê li Nisêbînê. Lê piştî demek mayîna li ber deriyê sînor ê Nisêbînê diyar bû ku destûr nîn e û ew Xapandine.
Hevserokê Komeleya Nivîskaran Mehmet Yilmaz ji bo Diyarnameyê wisa qala rewşa li Nisêbînê kir: "Ev du roj in em ewiqandin. Ji ber gotin destûr derketiye em hatin Nisêbînê. Walî jî ji me re got herin, temam e, destûr heye. Lê em hatin vir, na. Sozdan, lê soza xwe xwarin."
Piştî çend saetên li ber deriyê Nisêbînê ku diyar bû ku dê destûrê nedin, ber bi êvarkî nivîskar ji bo vegerin Amedê ketin rê.
Yilmaz balê dikişîne ser hewldana wan û dibêje: "Destûr nehatibe dayîn, em neçûbin Rojava jî em gihîştin armanca xwe. Li aliyê din ê sînor qelebalixek hebû hatibû pêşiya me, lê nebû. Di dawiyê de bi vê hewldanê me hestiyarbûneke çêkir, ez dibêjim em gihîştin armanca xwe."
Her wiha Yilmaz dibêje ewê piştî demekê careke din çûyîna Rojava biceribînin, lê vê carê dê ji deriyê Sêmalka re herin.
***
Nûçeyê eleqedar:
- Nivîskarên kurd ji bo Rojava diçin Nisêbînê (Deqeya dawî)
- Nivîskarên kurd li Dirbêsiyê sekinîne
.jpg)
.jpg)
