Batman
Di mîtînga ziman a li Batmanê de her kesî xwest, "Kurdî bibe zimanê fermî." Vaye not û axaftinên ji mîtîngê:

Mîtînga ku TZPKurdî bi diruşma "Em perwerdehiya bi zimanê zikmakî dixwazin" li Batmanê bi beşdariya bi hezaran kesî li dar ket. Girse li ber Mala Gel a Musa Anter bi rengên kesk û sor û zer, bi kincên xwe yên neteweyî hatin cem hev.

Di mîtîngê de mebûsên DTP'ê Osman Ozçelik, Bengi Yildiz, Ayla Akat Ata, mebûsa DEP'ê ya berê Leyla Zana, şaredarên DTP'ê, rêveberên DTP'ê û endamên saziyên sivîl amade bûn.

Axaftinên ji mîtîngê:

Serokê ÎHD'a Batmanê parêzer Ferhat Bayindir: Ev 30 sal in 50 hezar mirovî jiyana xwe ji dest da. Heta ku pirsgirêka kurd çareser nebe dê mirov bimirin û daristan bêne yewitandin. Ji bo vê divê pirsgirêka kurd bi riya demokratîk bê çareserkirin. Divê mafê zimanê zikmakî bê qebûlkirin.

Mebûsê DTP'ê yê Batmanê Bengî Yildiz: 80 sal in zimanê kurdî tê înkarkirin. Lewra kurd têne înkarkirin. Li Herêma Kurdistana Federe bi zimanê kurdî perwerdehî tê kirin li Tirkiyeyê berevajî vê yekê rewş heye. Wê rojê zarokek bi navê Berfîn destûr nedan bê Tirkiyeyê. Ev nîşaneyên qedexeya li ser vî zimanî ye. Emê li hemberî vê yekê li her derê ji bo perwerdehiya kurdî têbikoşin. Ji bo vê yekê em dibêjin êdî bes e. Em bang li gelê kurd dibin; yên ku bi zimanê we bi we re xeber nedin wan protesto bikin. Bila her kes ji bo kurdî têbikoşe.

Mebûsa DTP'ê Ayla Akat Ata: Em ji bo kurdî li qadê ne. Zimanê e dişibe bexçeyê gulan. Zazakî, kurmancî û soranî, ev gulên bexçeyê me ne. Gelê me ji bo zimanê xwe li qadê ye. Zimanê me çavkaniya jiyana me ye, rûmeta me, hebûna me ye. Emê bê çand û bêrûmet nejîn. Ji bo vê em ji înkar û asîmîlasyonê re dibêjin na.

Berdevkê TZPKurdî Qahir Bateyê: Divê mafê xweseriya demokratîk û mafên çandî bêne pejirandin. Divê kurdî bi awayekî fermî bê qebûlkirin, bikeve bin ewlehiya Zagona Bingehîn û astengiyên li ber ziman bêne rakirin. Divê li hemû dibistanan bi kurdî ders bê dayîn. Ji bo pêşketina kurdî divê pêdiviyên aborî û teknîkî bêne terxankirin. Divê dewlet kurdî bi awayekî fermî ziman qebûl bike.
Ez bang li siyasetmedar û hunermendên kurd jî dikim ku li her derê her gav bi kurdî biaxivin.

Mebûsê DTP'ê yê Sêrtê Osman Ozçelîk: Zarokek kurd heta 6 saliya xwe bi tirkî nizane. Lê li dibistana seretayî hînê tirkî dibe. Tiştên ku di van 6 salan de hîn bûye mecbûr dimîne ku wan ji mejiyê xwe bavêje. Ev qetlîamekê ye, asîmîlasyon e. Dewleta Tirkiyeyê pêşî mafê ziman û çanda kurd înkar dikir. Bi têkoşînê re dewletê kurdî qebûl kir. Lê gotin her kes dikare li mala xwe biaxive. Bi hinek din mezinbûna têkoşînê re vê carê mafê qursan qebûl kir. Lê em vê bes nabînin. Em dibêjin kurd û tirk bira ne. Her mafê ku ji bo tirkan hatiye qebûlkirin divê ji bo kurdan jî bê qebûlkirin. Divê di her warî de kurd jî xwedî mafê perwerdehiya bi zimanê xwe bin.

Leyla Zana: Ziman heysiyet û şerefa miletekê ye. Di meha remezanê de ji bo mirovekî av û xwarin çiqas pîroz be, ji bo gelekî jî ziman ew qas pîroz e. Gelekî xwedî li zimanê xwe dernekeve bila ne li bendê be ku dê hinên din bên xwedî lê derên. Gel ji bo ku hebûna xwe nîşan bide divê pêşî xwedî li zimanê xwe derê û wê bijî. Milet, ax, dîrok û çand yek in. Yek tune ya din jî nîn e. Divê em van hemûyan bi hev re bijîn.
Gotineke pêşiyan heye, "Çavê li deriyan xwelî li seriyan". Em ne ew milet in ku xwelî li ser be. Em mileteke bi şeref in. Em zimanê xwe pêş bixin û di her warê jiyanê de belav bikin. Em ne wekî 15-20 sal berê ne. Niha gelek sazî û dezgehên mehene. Ev dikarin bi rehetî bi kurdî perwerdehî bidin. Divê di vî warî de em xwe pêş bixin. Pêşî divê ziman bigirin bin ewlehiya zagonî, asîmîlasyon û astengiyên li pêş bêne rakirin. Ji bo pêşketina ziman divê şert û merc bêne çêkirin.

Di mîtîngê de pankartên "Bê ziman jiyan nabe", "Em perwerdehiya zimanê zikmakî dixwazin", "Zarok pêşeroj in, pêşeroj bê ziman nabe", "Zimanê me mifteya azadiya me ye", "Zimanê xwe bi destê xwe nekuje", "Zimanê min qedexe nekin", "Kurdî helbesta Xanî awaza Meryemxanê ye", "Ziman û rengên cuda nîşana mezinbûna xwedê ye" û "Ez Kurd im perwerdehiya bi kurdî dixwazim" hatin vekirin.

Dema ev nûçe hat weşandin Koma Nûjen a Navenda Çanda Biharê li ser dikê bû û stranên xwe pêşkêş dikir. Piştre dê bi konsera Bulent Turan mîtîng bi dawî bibe

Foto: DÎHA