Mem Mîrxan

DTP’ê 17’ê mehê bi daxweyaniyekê krîterên berendaman diyarkirin.
Berî ku dest bi şiroveyê bikin em dubare wan krîteran bibîr binin:
Divê berendam:
Girêdayî nirxên tekoşînê afirandî be,
Bi ziman û çanda kul ê bê hilbijartin re lihev hatî be, (yanê ku bi kurmancbin bi kurmancî,zazabin bi zazakî bizanibin)
Ji xebatê hez bike,
Xwedî projebe,
Biryarê ku ku bigire karibe di jiyanê de jî pêk bîne,
Divê navê wî/wê neketibe nav nîqaşên xirab,
Divê ji rantê dûr be,
Ne grupparêz, û belav kar be,
Divê navê wî/wêb i karên nebaş (dîzî, xinizî,) der neketibe
Û xala herî dawiyê divê gel pêbawer û jê hez bike.
Mirov ku bi kurtebirî bêje:
Divê yê ku bibe şaredar, kurdîhez û kurdewar be, xwedî soz û qerar be, bi şerf û namûs be, dengê gelê xwe yê bindest be. Lê rastiya jiyanê û hilbijatin pîrî caran hevûdin nagire.
Ku mirov dema borî dide ber çavan hem di nav yên bûne şaredar, hem jî yên nehatin hilbijartin de bi hêsanî dibîne ku hinek berendam sed gavî ji van pîvan û krîteran  dûr bûn û dîsa bi awayekî hatin hilbijartin.
Wan berendam û şaredaran di dehan platform û civînan de soza namûsê  dan ku wê di her şert û mercan de ji bo berjewendiyên gel  têbikoşin. Lê di encamê de ev necamêrana di nav berjewendiyê xwe yên şexsî û malbatî de lewitîn û fetisîn.
Wek Şaredarê Navçeya Hezro ya navçeya Amedê, serokê şaredariya  Dêrika Çiyayê Mazi, û   gelek endamên Meclîsê yên ji partiyê hatine qewirandin.
Belê wan şaredaran û endamên meclîsê hem wijdana xwe, hem jî hêviyên gelê xwe firotin.
Wek hilbijartinên 4 sal berê em tevli  hemû xalên ku îsal DTP’ê diyarkirine jî  dibin.
Ev partî ne zeviyek (axek) bêxwediye ku  hema kî hat cotê xwe lê bajo.
Divê pîvanên me jî weke tekoşîna me cidî be. Divê yên di komîsyonên hilbijartinê û di platformên azad de cîh digirin bi hesasiyeta zêrfiroşekî, her berendamekî tevî hemû girêdanên wî, baweriya wî, zanebûna wî û bikêrhatina wî binirxînin.
An encam wê weke “Apê Ho, weke do” be.
Niha tenê tiştek hey e min dixe nava gumanê.
Ew jî awayê hilbijartinê ye.
Weke hate eşkerekirin piştî derketina berendaman a li hember Platforma Azad dê 3 nav ji nawendê re bête şandin.
Li gor serboriyên hilbijartina sala 2004’an  ku 3 nav bêne şandin;em ê bi destê xwe 3 rakiban jî biafirînin. Û ev 3 kes tevî hemû kêmasiyên xwe, alîgir, nas û dostên  xwe wê têkevin nava hêviyekê.
Ku wek sîstema hilbijartina Rektorên YOK’ê, yê yekemin bê hilbijartin nûrî ela nûr, lê yê sêyemin bê hilbijartin, an yê duyemin bê hilbijartin teqez wê xeydandinek jî  çêbe.
Ji ber wê pêşniyarek min heye.
Li cihên krîtîk piştî derketina hember Platforma Azad bila yek nav bê hilbijartin û ji  Komîsyona Hilbijartinê ya  Nawendî re bê şandin. Navenda partiyê jî divê li benda  20 berfanbarê  (roja eşkerekirina berendaman) nemine.
Berendamên cihê krîtîk divê zû bêne eşkerekirin ku hem partî hem jî berendam karibin xebatek bi rêk û pêk bimeşînin.
Divê em lezkin.
Ji bo me rojek jî rojek e.

Ji Azadiya Welat hatiye girtin