ENQERE

HDP'ê êrîşên çeteyên DAIŞ'ê xist rojeva Meclisê û mesele ji Serokwezîr Davûtoglû pirsî.

Parlamenterê HDP'ê yê Rihayê Îbrahîm Ayhan der barê êrîşên çeteyên DAIŞ'ê yên li hemberî Kobanî de pêşniyarpirsek pêşkêşî Serokwezîrê Tirkiyeyê Ahmet Davûtoglû kir.

Di sedema pêşniyarpirsê de hat ragihandin ku 2 êrîş li Deriyê Sînor ê Murşîtpinarê pêk hatine û hat gotin: "Agahî hene ku çeteyên DAIŞ'ê li gelek gundên Kobanî sivîl qetil kirine. Di van êrîşan de zêdeyî 100 mirovî jiyana xwe ji dest daye, zêdeyî 200 kesî birîndar bûne. Ev yek bi awayekî fermî hate eşkerakirin. Îdîa hene ku çeteyên DAIŞ’ê sînorê Tirkiyeyê bi kar anîne û êrîş kirine. Tê îdîakirin ku ji berê ve agahiya rayedaran ji van êrîşan heye û wan êrîş piştguh kiriye."

Ayhan ji Davutoglu xwest bersiva van pirsan bide:

"Ajansa Anadolû (AA) çawa xwe gihandiye dîmenên êrîşa bombeya zindî ya saet di 04.30’an? Gelo dîmen ji aliyê nûçegîhanên Ajansa Anadoluyê hatiye kişandin? An kamerayên ewlehiyê ne?

Eger dîmen ji aliyê nûçegihanên AA’yê ve hatibin kişandin nûçegîhan di saet 04.30’an de çawa li ser sînor bûn, ev yek çawa dikare bê îzahkirin?

Bingeha daxuyaniya Walîtiya Rihayê ya êrîş ji aliyê Cerablusê ve pêk hatiye ji ku tê? Ev agahî berê yan piştre hatiye girtin?

Berî êrîşê di destê dewletê de têkîldarî êrîşeke bi vî rengî agahî hebû yan na, îstîxbaratek hebû? Eger hebû rayedaran bi meqamên têkîldar re ev yek parve kiriye an na?

Piştî êrîşê çeteyên DAIŞ’ê yên ji aliyê ‘hêzên ewlehiyê’ ve hatine girtin hene yan na? Eger hebin çend kes in, ji bo van tiştekî hiqûqî hatiye kirin an na?

Ji bo ku careke din êrîşeke bi vî rengî pêk neyê li sînor wê tedbîrên çawa bên girtin, planake wisa heye? Ji bo vê yekê gelo ferman ji wezaretê hatiye dayîn yan na?

Li hemberî van êrîşên ku çeteyên DAIŞ’ê li dijî Kobanî pêk anîn wê helwesta hikumeta we çawa be?"

**

Nûçeyên eleqedar:

- DAIŞ'ê çima êrîş kir? 

- Mebûs çûn ser sînorê Kobanî 

- 'Ji bo Kobanî bibin mertalên zindî' 

- Çeteyên DAIŞ'ê ji Tirkiyeyê ketin Kobanî û sivîl qetil kirin