ERDAL ALIÇPINAR - Koln

Hunersend Şivan Perwer li Kolnê daxuyaniyeke çapemeniyê da û bersiva çûyîna TRT 6'ê da.

Perwer îro li Hyatt otela li Kolnê li ser pêşniyara ku ji TRT'ê ji bo wî hatiye daxuyaniyeke da çapemeniyê û pirsên rojnamegeran bersivand.

Perwer da zanîn ku ew 35 sal in di xizmetê gelê xwe deş, 33 sal in jî li sirgûnê ye û wiha domand: "Em gelekî ne ku hatine parçekirin. Pirsgirêka kurd bûye pirsgirêka dinyayê. Rastiyeke me heye ew jî rastiya gelê kurd e. Em endamên vî gelî ne. Min heta niha êş, qêrîn û rastiyên gelê xwe anî ziman. Min li hemberî zilmê serî hilda. Ji bo vê yekê ev 33 sal in ez ji cihê ku lê hatine dinê, ji welatê xwe dûr im. Me li mala xwe bi kurdî, li derve bi tirkî xeber da, stranên min stranên serhildanê ne. Qêrîna gelekî ne. Pirsgirêka gel nehatiye çareserkirin. Bi vekirina kanalekê re jî çareser nabe."

Perwer da zanîn ku ew hunermendê gelê xwe ye, ew ne tenê stranê dibêje. di heman demê di li hemberî zilmê serî hil dide û wisa berdewam kir: "Ger îro qala aştiyê tê kirin, aştî bi wekhevî pêk tê. Divê kes ji navê Kurdistanê netirse. Piştî 85 salan gavekî avêtine, ger ji dil in, ger xizmetê statukoyê nekin dê tişteke baş be."

Hunermend Perwer got ku îro hunermendên kurd ku bi tirkî distrên divê êdî netirsin û gavan bavêjin û ev yek lê zêde kir: "Ev çima der barê pirsgirêka kurd de dengê xwe dernaxin. Îro min dixwest ev hunermendên li Tirkiyeyê gaveke bêtirs biavêta, ez vexwendama."

Şivan Perwer li ser hevdîtina bi mebûsê Amedê yê AKP'ê Abdurrahman Kurt û berpirsê TR'ê Sinan Îlhan re jî axivî û wiha got: "Li Bonnê bi rayedarên TRT'ê re me hevdîtineke pêk anî. Gelek dixwestin ez bêm. Lê min ji wan re got, ger ez bêm ez têm cem gelê xwe. Ez li gor baweriya xwe têm. Ez ji bo xêzên sor ez nayêm. Gelê kurd bi derfetên xwe kanal vekirin û vekirina van kanalan didomînin jî. Ger ez bixwazim derkevim televîzyonê pêşî televîzyonên kurdan ên wekî Roj Tv, Kurdistan Tv, Kurd 1 hene. Ez dê derkevim van deran û ez derdikevim jî. Ez hêvî dikim dê TRT di kanala kurdî de fêm bike ku strana Lorke Lorke aîdê çanda kurdî ye. Ger gelê kurd ji min re bibêje 'derkve' ezê derêm. Ger derketina min a televîzyonê kedeke wê ji bo aştiyê hebe ezê derêm."

Li ser gotinên ku Perwer bi TRT'ê re peymana li ser pereyan saz kiriye jî wisa got: "Gelê me hat qetilkirin. Gund hatin têkbirin. Bi hezaran mirovên me avêtin girtîgehan. Min têkoşîna xwe qet bi pereyan nepîvandiye."

Li ser pirseke li ser gotinên Serokwezîr Erdogan jî Şivan Perwer wisa got: "Gelê kurd pêşî piştgirî da Erdogan, lê ew jî li hemberî statukoyê têk çû. Divê bê zanîn ku gotinên 'yan hez bike yan terk bike' di salên 1930, 1945'an de li Almanyayê çi derxist holê."

Ji ANF'ê hatiye girtin