Diyarname

Me saleke li dû xwe hişt. Di vê salê de heta ji me hat me hin xizmet kir.

Di vê salê de jî emê heman tiştî bikin.
Di 2008'an de me gelek nûçe weşandin. Gelek nûçeyên me ji aliyê gelek malperan ve ji ber balkêşî û girîngiya xwe hatin bikaranîn.
Herhal em dikarin bi rehetî vê bibêjin: Malpera herî zêde jê nûçe tên girtin û weşandin Diyarname ye.
Vê yekê em ne wekî pesindanekê, em wekî xizmeteke ji bo raya giştî ya kurdan dibînin û em dibêjin; di 2009'an de jî ev xizmeta me dê bidome.

Em her sal nîqaşan li dar dixin û nîqaşên Diyarnameyê têne şopandin. Yek ji nîqaşên ku îsal me li dar xist jî meseleya têkiliya nivîskar û weşangeran bû.
Di vê nîqaşê de li dor 20'î nivîskarên kurd gotar şandin, me weşandin û nîqaşê gelek bal kişand. Nivîskarên kurd li ser nivîskariya xwe, li ser têkiliya xwe û weşangerên xwe tiştin gotin.

Dûre me xwest vê carê weşangerên kurd hem derdê xwe vebêjin, hem jî bersiva nivîskaran bidin lê mixabin em bi ser neketin. Çimaya vê ev bû: Weşanên Pêrî û Do'yê bersiva da, em li benda çend weşanxane bûn, piştî van meyê berê xwe bida weşanxaneyên din jî lê piştî weşanên Do û Pêrî ji weşanên din bersiv nehat. Ev derket: Me bi xwediyê Weşanên Avestayê Abdullah Keskîn re xeber da, hebû saet û nîvek zêdetir me sohbet kir. Keskîn gelek tişt got, lê nexwest em binivîsin. Bi xwediyê Weşanên Vate Deniz Gunduz re jî bi heman awayî. Me pirs ji xwediyê Weşanên Lîsê Lal Laleş re şand, dê bersiv bişanda, digel ku çend caran got temam jî, dîsa bersiv nehat. Welhasil ji ber vê yekê, me ji weşanên din jî tişt nexwest û ev nîqaşa me bi ser neket.

Ji bilî nîqaşan nûçeyên pirtûkên ku nû derketin, nûçeya kovarên kurdî, nûçeyên li ser sînemayê bi rêk û pêk me karî pêşkêşî we bikin, di sala nû de jî emê heman tiştî bikin.

Digel van têm be jî li ser aborî, spor û beşên din me tiştin pêşkêş kirin.

Nivîskarên me di dema xwe de nivîsên xwe şandin û me ew ragihandin we. Em careke din sipasdarê wan in.
Beşa me ya Serbest jî her ku çû xurt bû. Hêviya me ew e ku zêdetir xurtir bibe û carinan be jî nivîskarên nû nivîsên xwe bi rêya me ragihînin we xwendevanan.

Bi hêviya ku emê bikaribin sala 2009'an jî bi serbilindî derbas bikin.

Bi hêviya saleke biaramtir, serketîtir, bi hêviya pêşketina kurdî sersala we pîroz be.