Rizoyê XERZÎ

Wekî tê zanîn di navbera 8'ê vê mehê de li paytexta Siûdiyê Riyadê civînek ji bo ‘lêgerîna li çareseriyeke siyasî’ ji bo Sûriyeyê hat lidarxistin.

Lê dema mirov bala xwe dide kesên pêşengiya vê civînê dikin wê gavê mirov baş dizane ku dê çi ji gelê Sûriyeyê re bîne. Serkêşên vê civînê û welatên ku ew civîn di bin siya wan de pêk hat. Tirkiye, Siûdiyê û Qeterê wekî berdevkên siyasî ên çeteyên mîna El Nusra, Ehrar El Şam û gelek komên din tên binavkirin.

Lewre jî gelê Sûriyeyê baş dizane ku ev kesên bi navê muxalefetê jî li wir civiyane tenê aktorên ku pêlîstokên di destê van welatan de ne û muxalefeta rastî ya ku berdevkiya gelê Sûriyeyê dike nehatiye vexwendin bo wê civînê.

Lewre jî ew civîn dê ji çareseriyê bêtir bi xwe re berdewamiya şer û pevçûnan, berdewamiya koçkirin, kuştin û wêrankirina vî welatî û xelkê vî welatî bîne.

Mirov dikare teqîna ku berî 2 rojan li Til Temirê jî pêk hat wekî encama yekemîn a vê civînê binirxîne.

Ev hêzên ku herdem cihê xwe li kêleka komên çete girtine û piştgiriya wan kirine ji bilî hêsirên çavan û rijandina xwîna gelê Sûriyeyê tiştekî din pêşkêşî vî welatî nekirine.

Niha jî di vê civînê de hewl didin ku van çeteyan bi rengekî din birêxistin bikin. Dixwazin ku çeteyên wekî Nusra û Ehrar el Şam û gelek komên din ên di warê navnetewî de wekî rêxistinên çeteyan hatine qebûl kirin ji nû ve di bin navekî din de birêxistin bikin û wan wekî şoreşgerên Sûriyeyê pêşkêş bikin.

Ew muxalifên ku li gorî dilê xwe û berjewendiyên xwe amade kirine jî dê sîwana siyasî ya vê hêza nû ya leşkerî be.

Wiha xuya dike ku dê yek ji armancên wan ên sereke jî ew be ku êrîşî destkeftî û aramiya kurdên rojavayê Kurdistanê bikin. Wekî tê zanîn berî çend rojan hêzên ku qaşo li Humsê li dijî rejîmê şer dikirin, wan û rejîmê li hev kirin. Humsê teslîmî rejîmê kirin û berê xwe dan Idlibê ku xwe nêzî sînorê Efrînê bikin.

Efrîna ku serê çend sala ye di bin dorpêçkirina van hêzan de ye û niha êrîşên dijwar li dijî Efrînê hene û piştî vê civîna Riyadê dê êrîşên li dijî wî bajarê kurdan û tevahiya Rojava zêdetir bibin.

13.12.2015, Azadiya Welat