AMED (DÎHA)

Bi Cîgirê waliyê Amedê Mehmet Demîr re ji bo nûçegihanê DÎHA'yê Mazlum Dolan hevdîtin pêk hat û daxwaza vekirina korîdorekî hat kirin. Demir destnîşankir ku ev daxwazeke siyasî ye û gotinên waliyê Şirnexê ê ji bo Cizîrê gotibûn dubare kir.

Hevdîtinên ji bo 200 sivîlên ku tê de nûçegihanê me Mazlum Dolan jî heye û li navçeya Sûra Amedê asê mane berdewam dikin. Serokê Lijneya Rêvebiriya DÎHA'yê Zekeriya Guzupek, parêzerê ajansa me Resul Tamur û şandeyeke ku ji endamên Lijneya Rêvebiriya Baroya Amedê pêk tê ji bo mijarê çûn walitiya Amedê. Şandeyê li vir bi Cîgirê Waliyê Amedê Mehmet Demir re hevdîtin pêk anî. Demir piştî agahiyên parêzeran axivî û diyar kir ku ew tu kesî îmha nakin û wiha got: "Heya niha me di tu operasyonan de tu kesekî sivîl îmha nekiriye. Kesên bi alên spî vedikin tên parastin û em temînatê didin." 

Li ser vê ji ajansa me Guzupek komkujiyên li Cizîrê pêk hatin bi bîr xist û wiha got: "Li Cizîrê pratîkek pêk hat. Rewşa dayika Taybet diyar e. Jinên ducanî û pir hatin gulebarankirin."

'Ev der ne Cizîr e' 

Cîgirê Walî Demir wiha got: "Ev der ne Cizîr e. Li wir çi qewimîn ez nizanim. Lê li vir kesên dixwazin derkevin dikarin. Cihê pêywirdar tên agahdarkirin. Ji ber ku rayeya operasyonan ne di destên me de ne. Daxwaza korîdorê ya rêxistinên saziyên sivîl siyasî ye. Hewldanên rizgarkirina terorîstên wê derê ne. Ji ber ku di jêrzemînan de sivîl hene ev daxwaz tên. Lê agahiyeke bi vî rengî negihîşt ber destên me."

Guzupek jî agahiyên ku ji nûçegihanê me Dolan hatiye ragihand û numareya telefonê da Demir. 

Li ser vê yekê Demir hêjmara telefonê ji Midiruyeta Polîsan re ragihand û midiruyetê diyar kir ku ev telefon di destê wan de heye. 

Piştî hevdîtinê Demir Wekîlê Serokê Baroya Amedê Ahmet Ozmen geriya û ev tişt ragihandin: "Bila di vê saetê de tu kes dernekeve derve. Sibê danê sibehê kesên sivîl ên bi alên spî derdikevin re em ê bibin alîkar."