Diyarname

Di çarçoveya rêzesemînerên li Weqfa Îsmaîl Beşîkçî de êvara 5'ê mehê vê carê lêkolîner û zimanzanê kurd Malmîsanij gotara xwe bi sernavê "Berî 1925'an Rojnamegeriya Kurdî" pêşkêş kir. Yek ji rêveberên weqfê Ahmet Onal qala kurtejiyana Malmîsanij kir û ew vexwend ku gotara xwe pêşkêş bike.

Malmîsanij ku li ser wê demê lêkolînên wî hene ji rojnameya "Kurdistan" ku di sala 1898'an de ji aliyê Mîthed Mîqdad Bedirxan ve hatibû derxistin dest pê kir û dûre heta Komara Tirkiyeyê qala wê rewşê kir. 

Vaye ji pêşkêşiya Malmîsanij hin not:

- Malbata Bedirxanî ku yek ji wan Mîthed rojname derxist malbatek fireh bû. 99 zarokên Bedirxan hebûn. Ji wan 5 jê li nav Osmanî paşa bûn. Osmanî wê demê li herêmê kî xurt ba yan sirgûn dikir, yan jî paye dida wan û bi vî awayî polîtîkaya xwe dimeşand.

- Zarokên Bedirxan çend caran xwestin vegerin Kurdistanê û bi rê ve bibin lê di rê de bi paş ve hatin şandin.

2000 hebî dişînin Kurdistanê

- Rojnamegeya Kurdistan dema derdikeve 2000 hebê wê dişînin Kurdistanê û bê pere belav dikin. Girîngiya wê ev e ku cara pêşî bi kurdî rojname dertê. Agahî jî têde hebûn, li ser tarîxa Kurdistanê jî nivîs nivîsandine di rojnameyê de.

- Ebdulhemîd dixwaze ermeniyan û kurdan bide hev, Evdilrehman Bedirxan biroşurek dinivîse û dixwaze kurdan li ser vê hişyar bike.

Miqdad Bedirxanê rojname derxistiye demê sawcîtî jî kiriye.

- Wan zimanê nivîskî pêş ve biriye ev yek muhîm e.

Amblema masonan

- Mihemed Salih Bedirxan di sala 1900'î de rojnameya "Umîd" derdixe. Amblema Masonan li ser heye. Hejmarên min dît bi tirkî-erebî bû, dibêjin bi kurdî jî weşan kiriye lê min ew hejmar nedîtine.

- Ez rojnameyan dikim sê be; yên berî Meşrûtiyetê, yên piştî Meşrûtiyetê û yên di dewra Mutarekeya Mondoros de.

- Berî 1908'an rojnameyên derdikevin şexsî ne, piştî wê êdî sazî weşanan derdixin, wekî weşana fermî ya Kurt Tealî Cemiyetî.

- 1909'an de Ziya Gokalp "Peyman"ê li Amedê derdixe.

- Wê demê dema em dinêrin li ser pirsgirêka jinan jî nivîs hatine weşandin. Yek ji wan bi navê "Kurtlerde Kadin Meselesî". Li gor îro helbet ne zêde muhîm e, lê li gor wê demê girîng in.

Qedexeya pirtûkan

- Niha dibêjin Kemalîstan yekem car kurdî qedexe kir, na, wê demê jî qedexe ye. Di sala 1906'an de Ebdulhemîd fermannameyek diweşîne û têde kurdî û arnawûdî qedexe dike. Jixwe wê demê hindik pirtûkên kurdî hene. Dibêjin 'Herin ji pirtûkxaneyan kombikin û bişewitînin.'"