Diyarname
Pirtûka çîrokan a nivîskarê me Çiya Mazî bi navê “Mijarên Mîqro” ji Weşanên Doyê derket.

Heta hiha li gelek weşanan çîrokên nivîskarê malpera me Çiya Mazî hatine weşandin. Ji van çîrokan yek jê jî bi navê “Mistek Jiyan” bûbû pirtûk û ji Weşanên Sî derketibû. Mazî niha bi pirtûkek din a çîrokan, bi “Mijarên Mîqro” derket pêşberî xwendevanên xwe.
Nivîskar Mazî di “Mijarên Mîqro” de ji alî teknîk û şêwazê de guherîneke xwe nîşan dide. Çîrokên di “Mistek Jiyan” de ku piraniya wan li ser jiyana kurdan bû, di vê pirtûkê de piranî pisîkolojiya derdikeve pêş. Tiştên biçûk ku mirov lê heyîrî dimînin an mirov bi wan tiştan dikevin astengiyên mezin û nikarin derkevin bi piranî bûne mijara çîrokên Mazî. Minak; kêzikek, xewna zarokekî, çeqmaq, dibistan û fîkandina mirovekî bûne mijara çîrokên wî.
Ji nav çîrokan di çîroka “Dara Bihîvê” de xwendevan rastî kuştinajin û qîzan tên; di çîroka “Şemo Şano” de hînbûna îşkenceyê ku mirov êdî demek tê îşkenceyê bi tiştekî nahesibîne xuya dike. Her wiha carinan mirov dibin wekî wahş û hirçan û bêrehm dimînin di çîroka “Şahîdî” de. Lehengê çîroka balkêş “Dîmen xweş e” bi navê  “Brêz M.” zixtan li pîroziya dayikê dixe û dibêje “ez ji diya xwe hez nakim”.
Her wiha “Xewna Dawî”, “Tenûra mala şêx”, “Em” “Ma ev jî nig in”, “Kekê mino zava” “Dînamo” hin çîrokên din in ku di “Mijarên Mîqro” de cihê xwe girtine.

Çiya Mazî kî ye?
Nivîskar Çiya Mazî di sala 1960’î de li gundê Kufragê ya Şemrexa Mêrdînê hatiye dinê. Ew ji sala 1993'yan ve bi kurdî dinivîsîne. Heta niha gelek çîrok, helbest, nivîsên zargotinî û gelek cure nivîsên din ên Çiya Mazî di rojname, kovar û malperan de hatine weşandin. Çiya Mazî ku niha li Mêrdînê dijî, di quncikê xwe “Gername” yê di Diyarnameyê de nivîsên xwe diweşîne.

Xelatên ku wî girtine:
- Di pêşbazşiya çîrokan a TUHAYDER’ê de xelata yekemînî (1997).
- Di pêşbaziya çîrokan a NÇM (Navenda Çanda Mezopotamya) li Stenbolê bi çîroka "agir jî dîl bû" xelata teşvikê (1997)
-  Di pêşbaziya NÇM’ê ya çîrokan de bi "Mistek jiyan dixwazim" xelata yekem (1999) girt.

Pirtûkên wî:
- Mistek jiyan (çîrok, 2003), Weşanxaneya Sî, Stenbol.
- Ferhenga Gotinên Pêşiyan (2005), Weşanên Elma, Stenbol.
- Ferhenga Gotinên Pêşiyan (bi tîpên erebî, 2006), Weşanên Spîrêz, Duhok.
- Palûte (helbest, 2008), Weşanên Do, Stenbol)
- Ahuzin (Muslum Yucel) (wergera Çiya Mazî, helbestan, 2008), Weşanên Do, Stenbol.
- Mijarên Mîqro (çîrok, 2009), Weşanên Do, Stenbol.

Ji bo xwestinê:
doyayinlari@hotmail.com
Telefon: (0212) 2430156
Faks      : (212) 2527048
STENBOL