Diyarname

Komek ciwanên AKP'yî li Îzmîtê kêr li porteqalan dan û bi vî awayî Hollanda protesto kirin, lê çi eleqeya porteqalan bi Hollandayê re heye?

Pêşî Almanyayê, dûre Hollanda û Swêdê civînên wezîrên AKP'ê betal kirin. Ligel Hollandayê ev xirecir mezintir bû ji ber ku rayedarên Hollandayê bi temamî nehiştin wezîrên AKP'ê bikevin nav welat. Li ser vê yekê komek endamên Baskên Ciwanên yên AKP'ê yên Îzmîtê li Antîkkapi Restorant dê civîn çêbikira, berî civînê ji bo protestokerina Hollandayê bi porteqalan çalakiya şermezarkirinê li dar xistin. 

Ciwanên AKP'ê kêr li porteqalan dan, ew guvaştin, ava wan rijandin, hinan ava porteqalan vexwarin. Bi kurt kurmancî bi porteqalan Hollanda şermezar kirin. Lê çi eleqeya porteqalan û Hollandayê re heye? Ma porteqal berhemên Hollandayê ne? Ma porteqal nîşaneyên Hollandayê ne? Na.

Vaye çîroka porteqalan û Hollandayê:

Di 14'ê avrêla 1907'an de tîma neteweyî ya Hollandayê ji bo lîstina maçê diçe Antwerpa Belçîkayê. Di vê maçê de yekemîn car Hollanda formaya tûrûncî li xwe dike. Sedem jî ev e; Paşnavê malbata qraliyetê ORANJE ye. Ji bo vê yekê formayê jî di rengê oranjê, yanê tûrûncî li xwe dikin. Bi hollandî "oranjê" wekî "oranyi" dixwînin ku ev yek ne di wateya porteqalê lê di wateya rengê "tûrûncî" de ye. 

Di ala (sor, sipî, hêşîn) Hollandayê de jî rengê porteqalê, yanê tûrûncî nîn e (lê berî sedsala 17'an ji dêvla sor tûrûncî hatiye bikaranîn, ew qas). 

Formaya tîma neteweyî ya Hollandayê hê jî tûrûncî ye. Li dinyayê hemû pêşkêşvanên sporê dema qala tîma Hollanda dikin dibêjin "Tûrûncî" lê tenê tirk ji wan re dibêjin "Porteqal"...

Û niha ev endamên Baskên Ciwanên AKP'ê bi porteqalan Hollanda şermezar kirin bêyî porteqal malên Hollandayê, yan jî sembola wan bin.

Û gotina dawî li ser porteqalan: Li Tirkiyeyê hilberîna porteqalan heye, piraniya porteqalên li piyaseyê malên Tirkiyeyê ne, lê beşek jê ji derve dikirin, ew jî piranî ji Polonyayê.